Wararka24: Madaxweynaha Jamhuuriyadda Federaalka Soomaaliya, Xasan Sheekh Maxamuud, oo uu weheliyo Madaxweynaha Koonfur Galbeed, Sheekh Aadan Maxamed Nuur (Aadan Madoobe), ayaa maanta si wadajir ah u dhagax dhigay dhismaha waddo laami ah oo isku xiri doonta Garoonka Diyaaradaha Shaati Gaduud iyo saldhigga dhexe ee magaalada Baydhaba.
Munaasabadda dhagax-dhigga ayaa waxaa ka qeyb galay mas’uuliyiin ka tirsan Dowladda Federaalka Soomaaliya, maamulka Koonfur Galbeed, saraakiil iyo qeybaha kala duwan ee bulshada, kuwaas oo soo dhaweeyay mashruuca cusub ee lagu horumarinayo kaabeyaasha magaalada.
Dhismaha waddadan ayaa qeyb ka ah dadaallada lagu horumarinayo kaabeyaasha dhaqaalaha iyo adeegyada bulshada, si loo fududeeyo isu socodka gaadiidka iyo shacabka, isla markaana loo xoojiyo adeegyada muhiimka ah ee Baydhaba.
Mas’uuliyiinta ayaa sheegay in waddadani ay door muhiim ah ka qaadan doonto isku xirka garoonka diyaaradaha iyo xarumaha dowladda, iyadoo sidoo kale kor u qaadi doonta dhaq-dhaqaaqa ganacsiga iyo horumarka magaalada.
Madaxweyne Xasan Sheekh Maxamuud ayaa xusay in dowladda federaalka ay mudnaan gaar ah siinayso hirgelinta mashaariicda la xiriira waddooyinka, garoomada iyo adeegyada aas-aasiga ah, si loo dardargeliyo koboca dhaqaalaha iyo horumarka dalka.
Waxa uu sidoo kale carrabka ku adkeeyay in dowladdu sii wadi doonto mashaariicda lagu tayeynayo kaabeyaasha dhaqaalaha iyo adeegyada bulshada, si loo abuuro fursado horumarineed oo waara oo ay ka faa’iideystaan shacabka Soomaaliyeed.
Mashruucan cusub ayaa la filayaa inuu wax weyn ka beddelo bilicda magaalada Baydhaba iyo isku socodka gaadiidka, isagoo qeyb ka noqonaya qorshaha lagu casriyeynayo kaabeyaasha muhiimka ah ee dowlad-goboleedka Koonfur Galbeed.
