Wararka24: Warbaahinta Israel ayaa si weyn uga hadashay mashruuca saldhigga hawada sare ee Turkiga ka dhisayo Soomaaliya, iyadoo ku tilmaantay inuu leeyahay saameyn amni iyo istiraatiiji ah oo ka baxsan ujeeddooyinka rasmiga ah ee lagu sheegay iskaashi dhinaca teknoolojiyadda iyo hawada sare.
Wargeyska Jerusalem Post ayaa warbixin uu daabacay ku sheegay in xarunta la qorsheynayo in laga hirgeliyo Soomaaliya aysan ku koobnaan doonin adeegyada la xiriira dayax-gacmeedyada iyo cilmi-baarista hawada sare, balse ay suurta-gal tahay in loo adeegsado tijaabooyin la xiriira gantaallada riddada dheer ee Turkiga.
Warbixintu waxay muujisay walaaca ay qabaan qaar ka mid ah warbaahinta iyo falanqeeyayaasha Israel ee ku saabsan sii xogeysiga saameynta Turkiga ee Geeska Afrika, gaar ahaan Soomaaliya oo sanadihii u dambeeyay xoojisay xiriirka dhinacyada amniga, dhaqaalaha iyo tababarka ciidamada ee kala dhexeeya Ankara.
Jerusalem Post ayaa sidoo kale sheegtay in mashruucan uu qayb ka yahay istiraatiijiyad ballaaran oo Turkigu ku xoojinayo joogitaankiisa gobolka, iyadoo lagu tilmaamay in Soomaaliya ay leedahay muhiimad juqraafiyeed oo ku dhow marin-biyoodka Badda Cas, Badweynta Hindiya iyo Bariga Dhexe.
Warbixinta ayaa xustay in haddii xaruntu awood u yeelato horumarinta ama tijaabinta nidaamyo cusub oo gantaallo ah, ay arrintaasi abuuri karto walaac amni oo dheeraad ah oo ka dhex muuqda dalalka gobolka. Qodobka la xiriira Somaliland ayaa sidoo kale ka mid ahaa arrimaha lagu soo qaaday warbixinta, iyadoo warbaahinta Israel ay si gaar ah u falanqeysay saameynta ay yeelan karto xoojinta xiriirka Soomaaliya iyo Turkiga.
Turkiga ayaa Soomaaliya ka noqday mid ka mid ah saaxiibbada ugu dhow tan iyo sanadkii 2011, waxaana labada dal ay yeesheen iskaashi dhinacyada waxbarashada, caafimaadka, kaabayaasha dhaqaalaha iyo amniga. Sannadkii 2017 waxaa Muqdisho laga furay saldhigga ugu weyn ee Turkiga ku leeyahay dibadda, halka bishii Febraayo 2024 labada dal ay kala saxiixdeen heshiis difaac iyo iskaashi dhaqaale oo muddo toban sano ah soconaya.
Dowladda Soomaaliya ayaa mashruuca hawada sare u aragta fursad lagu horumarinayo aqoonta teknoolojiyadda, kor loogu qaadayo awoodda cilmi-baarista iyo in dalka uu kaalin muuqata ka yeesho iskaashiga caalamiga ah. Ilaa hadda ma jiro war rasmi ah oo ka soo baxay dowladda Soomaaliya ama Turkiga oo ku saabsan walaaca ay warbaahinta Israel ka muujisay mashruucaasi.
