Wararka24: Xildhibaanno ka tirsan Golaha Shacabka iyo Aqalka Sare ee Baarlamaanka Federaalka Soomaaliya oo laga soo doorto Puntland ayaa ugu baaqay Madaxweyne Xasan Sheekh Maxamuud inuu xilka wareejiyo, iyagoo ku eedeeyay inuu ku tuntay dastuurka isla markaana uu dhaawacay nidaamka federaalka ee dalka.
War-murtiyeed ay soo saareen xildhibaannadan ayaa lagu sheegay in muddo-xileedka dastuuriga ah ee madaxweynaha iyo qaar kamid ah hay’adaha dowladda uu dhammaaday, ayna lagama maarmaan tahay in la raaco qodobada dastuurka iyo habraacyada sharci ee la xiriira kala-guurka siyaasadeed.
Xildhibaannadu waxay ku eedeeyeen dowladda federaalka inay qaaday tallaabooyin ay ku tilmaameen kuwo wiiqaya nidaamka federaalka, isla markaana ay faragelin ku hayso arrimaha Puntland. Waxay sheegeen in xaaladdaasi ay sii kordhisay khilaafaadka siyaasadeed iyo xiisadaha ka taagan dalka.
War-murtiyeedka ayaa sidoo kale lagu cambaareeyay waxa ay xildhibaannadu ku tilmaameen adeegsiga maleeshiyaad beeleed lagu magacaabay Ciidanka Xoogga Dalka Soomaaliyeed, iyagoo sheegay in arrintaasi ay saameyn ku yeelan karto kalsoonida shacabka ee hay’adaha amniga.
Xildhibaannada ayaa ugu baaqay shacabka Soomaaliyeed, siyaasiyiinta, odayaasha dhaqanka iyo bulshada rayidka ah inay ilaaliyaan dastuurka, nabadda iyo wadajirka dalka, ayna ka fogaadaan tallaabooyin horseedi kara qalalaase siyaasadeed ama amni.
Waxay sidoo kale ugu baaqeen beesha caalamka inay si dhow ula socoto xaaladda siyaasadeed ee Soomaaliya, gaar ahaan arrimaha la xiriira kala-guurka siyaasadeed iyo khilaafaadka u dhexeeya dowladda federaalka iyo Puntland.
Dowladda Federaalka Soomaaliya ayaan weli si rasmi ah uga hadlin war-murtiyeedka ay soo saareen xildhibaannadan. Khilaafka u dhexeeya Muqdisho iyo Puntland ayaa muddooyinkii dambe sii xoogeysanayay, iyadoo ay isa soo tarayaan hadallada siyaasadeed ee ay is dhaafsanayaan labada dhinac.
