Wararka24: Madaxweynaha Galmudug Axmed Cabdi Kaariye (Qoor Qoor) ayaa galabta soo gaaray magaalada Muqdisho, iyadoo mas’uuliyiin ka tirsan dowladda federaalka, siyaasiyiin iyo xubno kale ay ku soo dhaweeyeen Garoonka Diyaaradaha Aadan Cadde.
Soo dhaweynta waxaa ka qeyb galay Taliyaha Hay’adda Sirdoonka iyo Nabad-sugidda Qaranka Mahad Salaad, xildhibaanno, wasiirro iyo siyaasiyiin kale oo ka tirsan Galmudug. Muuqaallo laga baahiyay garoonka ayaa muujinayay kulan salaan iyo is-xog wareysi ah oo dhex maray mas’uuliyiinta halkaasi ku sugnaa.
Qoor Qoor oo hadal kooban siiyay warbaahinta ayaa sheegay in xaaladda siyaasadeed ee Galmudug ay ku soo dhammaatay is-afgarad, isla markaana la qorsheynayo hannaan doorasho oo lagu heshiiyay. Wuxuu xusay in wada-hadalladii dhacay ay horseedeen isfaham siyaasadeed oo u dhexeeya dhinacyadii ay khuseysay arrinta Galmudug.
Madaxweynaha Galmudug ayaa sidoo kale tilmaamay in deegaannada maamulka ay u baahan yihiin xasillooni siyaasadeed iyo wada-shaqeyn si loo xaqiijiyo geeddi-socod doorasho oo lagu wada qanacsan yahay.
Wararka siyaasadeed ee soo baxay maalmihii la soo dhaafay ayaa sheegayay in Qoor Qoor iyo Dowladda Federaalka Soomaaliya ay gaareen heshiis la xiriira hannaanka doorashooyinka la filayo inay ka dhacaan Galmudug. Ilo siyaasadeed ayaa sidoo kale sheegay in madaxweynuhu uu ka tanaasulay qorshe uu mar kale ugu tartami lahaa xilka madaxweynaha maamulka.
Axmed Cabdi Kaariye ayaa la filayaa inuu maalmaha soo socda kulamo la yeesho madaxda sare ee dowladda federaalka, kuwaas oo diiradda lagu saari doono arrimaha siyaasadda, amniga iyo doorashooyinka.
Imaanshaha Qoor Qoor ee Muqdisho ayaa kusoo aadaya xilli ay socdaan dadaallo lagu xoojinayo is-afgaradka siyaasadeed ee u dhexeeya Dowladda Federaalka Soomaaliya iyo dowlad-goboleedyada dalka, gaar ahaan arrimaha la xiriira hannaanka doorashooyinka iyo dib-u-habaynta nidaamka siyaasadeed.
