Ciidanka Asluubta Soomaaliyeed ayaa ku biiray hawlgalka dalka ka socdo ee lagu la dagaalamayo maleeshiyada Al-Shabaab, ka dib markii cutubyo ka tirsan laga ambabixiyay magaalada Muqdisho.
Taliyaha Ciidanka Asluubta Soomaaliyeed, General Mahad Cabdiraxmaan Aadan, ayaa shalay galab oo Axad ahayd ciidamadaasi kula hadlay Xarunta Taliska Asluubta ee Muqdisho, isagoo u sheegay inay dagaal u socdaan.
“Dagaal ayaad u socotaan, ma idiinka qarinaayo, waxaadna wadataan qoriga aakaha (AK47) iyo hubka waaweyn, intaba. Waxaa waaye cadowga ku dil, adna isku difaac,” ayuu yiri Taliyaha.
General Mahad ayaa ciidamada kula dardaarmay inay muujiyaan asluub, akhlaaq, deganaan, iyo xusuus ah wixii loo soo diray. “Nin walba wixii loo diray inuusan hilmaamin oo maskaxdiisa ay ku duubnaato,” ayuu ku dheeraaday.
Wararka qaar ayaa sheegaya in loo daabulay duleedka degmada Afgooye, halkaas oo walaac amni uu ka jiro, ka dib markii Al-Shabaab la sheegay inay culeys soo saareen. Halka wararka kalena ay sheegayaan in ciidamadu ay ku wajahan yihiin gobolka Shabellaha Dhexe.
Ciidamadan oo la socda gaadiidka askarta lagu daabulo ayaa ka dhaqaaqay xaruntooda, si sax ahna looma sheegin halka ay ka hawlgali doonaan.
Tani waxay noqoneysaa markii ugu horreysay oo Ciidanka Asluubta loo diro aagagga dagaalka, muddadii dagaalka lagu la jiray Al-Shabaab.
📌 Wararka24 – Xog rasmi ah oo faahfaahin degdeg ah
