Wararka24: Duqa Magaalada St. Louis Park ee gobolka Minnesota dalka Mareykanka, Naadiya Maxamed, ayaa maanta soo gaartay magaalada Muqdisho, iyadoo si diirran loogu soo dhaweeyay Garoonka Diyaaradaha Caalamiga ah ee Aadan Cadde.
Mas’uuliyiin ka tirsan dowladda iyo xubno kale ayaa ku qaabilay garoonka diyaaradaha, iyagoo muujiyay soo dhaweyn iyo taageero ku aaddan booqashada ay ku timid Soomaaliya.
Naadiya Maxamed ayaa sheegtay inay ku faraxsan tahay dib ugu soo laabashada dalkeeda hooyo kadib muddo ku dhow toban sano. Waxay xustay in booqashadeedii ugu dambeysay ee Soomaaliya ay ahayd sanadkii 2016, isla markaana ay hadda aragtay isbeddello muuqda oo ka dhacay magaalada Muqdisho.
Waxay tilmaantay in horumarka laga dareemayo caasimadda uu yahay mid dhiirrigelin leh, iyadoo ku baaqday in la sii xoojiyo dadaallada lagu horumarinayo adeegyada bulshada, kaabeyaasha dhaqaalaha iyo xasiloonida dalka.
Naadiya Maxamed ayaa noqotay qof si weyn looga yaqaan siyaasadda Mareykanka kadib markii bishii November 2023 loo doortay Duqa Magaalada St. Louis Park. Doorashadeeda ayaa ka dhigtay qofkii ugu da’da yaraa ee qabta xilkaas magaaladaasi, iyadoo heshay taageero ballaaran oo ka timid codbixiyeyaasha.
Booqashadeeda Muqdisho ayaa ku soo beegantay xilli xubno badan oo ka tirsan qurba-joogta Soomaaliyeed ay kordhinayaan socdaallada ay ku yimaadaan dalka, si ay uga qeyb qaataan maalgashiga, horumarinta bulshada iyo xoojinta xiriirka ay la leeyihiin shacabka Soomaaliyeed.
Qaar ka mid ah dadka la socda arrimaha qurba-joogta ayaa aaminsan in booqashooyinka noocan oo kale ah ay gacan ka geysan karaan kobcinta xiriirka u dhexeeya gudaha dalka iyo Soomaalida ku nool dibadda, gaar ahaan dhinacyada dhaqaalaha, waxbarashada iyo maamulka.
Naadiya Maxamed ayaa la filayaa inay kulamo kala duwan la yeelato mas’uuliyiin iyo qeybaha bulshada inta ay ku sugan tahay Muqdisho, inkastoo aan weli si rasmi ah loo shaacin jadwalka booqashadeeda.
