Wararka24: Dowladda Mareykanka ayaa shaacisay inay ka hor istaagi doonto taageerada ay Qaramada Midoobay siiso howlgalka Midowga Afrika ee Soomaaliya ee AUSSOM laga bilaabo bilowga sanadka soo socda, sida ku cad dukumenti diblomaasiyadeed oo la soo bandhigay.
Go’aankan ayaa loo arkaa mid saameyn weyn ku yeelan kara howlgalka AUSSOM, kaas oo door muhiim ah ka qaata taageerada ciidamada dowladda Soomaaliya iyo howlgalada ka dhanka ah Al-Shabaab. Howlgalka ayaa waxaa ku sugan ku dhowaad 12,000 oo askari oo ka socda dalal kala duwan oo Afrikaan ah.
Howlgalka AUSSOM aya si weyn ugu tiirsan taageerada ay bixiso xafiiska taageerada Qaramada Midoobay ee Soomaaliya ee UNSOS, kaas oo mas’uul ka ah adeegyada sahayda, raashinka, biyaha, shidaalka, adeegyada caafimaadka iyo gaadiidka ciidanka.
Qoraal diblomaasiyadeed oo ku taariikheysan 1-da Luulyo ayaa lagu sheegay in Washington ay Midowga Afrika ku wargelisay inaysan taageeri doonin sii wadista maalgelinta iyo adeegyada ay UNSOS siiso howlgalka wixii ka dambeeya dhammaadka sanadkan. Miisaaniyadda UNSOS ayaa lagu qiyaasaa ku dhowaad 500 milyan oo dollar.
Mareykanka ayaa sheegay inuusan ka hor imaan doonin cusbooneysiinta muddo xileedka AUSSOM ee Golaha Ammaanka ee Qaramada Midoobay, balse uu diidi doono wixii taageero dheeraad ah oo dhinaca sahayda, adeegyada farsamada ama hawlgalka ah ee loo qorsheeyo howlgalka.
Guddiga Midowga Afrika ayaa xubnaha Golaha Nabadda iyo Ammaanka ee ururka ku wargeliyay in go’aanka Mareykanka uu yeelan karo saameyn ku saabsan joogitaanka ciidanka, helitaanka sahayda iyo maalgelinta howlgalka. Diblomaasiyiin la socda arrimaha amniga ayaa sheegay in AUSSOM ay wajihi karto caqabado waaweyn haddii aan la helin taageero kale oo beddesha kaalinta Qaramada Midoobay.
Qoraalka Mareykanka ayaa sidoo kale xusay in Soomaaliya ay weli wajahdo caqabado la xiriira xasilinta dalka, dib-u-habeynta hay’adaha amniga iyo xoojinta awoodda ciidamada qaranka. Dowladda Soomaaliya weli kama aysan soo saarin war rasmi ah oo ku saabsan mowqifka cusub ee Washington.
