Wararka24: Guddoomiyaha Ururka Haweenka Gobolka Banaadir, Jawaahir Baarqab, ayaa maanta shir jaraa’id oo ay ku qabatay Muqdisho kaga hadashay kiiska gabadh yar oo lagu dhibaateeyay goob fagaare ah oo lagu soo dhaweynayay qof caan ka ah baraha bulshada oo dib ugu soo laabtay caasimadda. Muuqaalka gabadha yar oo ku baahay baraha bulshada ayaa muujinayo wiilal dhalinyaro ah oo ku xadgudbayo gabadha, waxaana ka dhashay caro xoogan.
Jawaahir Baarqab ayaa sheegtay in dadaallo lagu raadinayay gabadha aysan weli guuleysan. Waxay tilmaantay in hay’adaha ay khuseyso ay baadi-goob ku sameeyeen meelo kala duwan, balse aan wali la helin gabadhaasi.
Guddoomiyaha ayaa sidoo kale sheegtay in dhacdadaasi ay u muuqato mid u baahan baaritaan dheeraad ah, iyadoo xustay in laamaha ammaanka iyo hay’adaha garsoorka looga baahan yahay inay xaqiiqda dhacdada si buuxda u ogaadaan.
Dhacdadan ayaa dhalisay falcelin ballaaran oo ka timid bulshada Soomaaliyeed, kaddib markii muuqaal muujinaya gabadh lagu xadgudbayo uu si weyn ugu faafay baraha bulshada. Dad badan ayaa dalbaday in tallaabo sharci ah laga qaado cid kasta oo ku lug lahayd falkaasi.
Dhanka kale, ciidamada Booliska Soomaaliyeed ayaa weli wada baaritaanno la xiriira dhacdada, iyagoo baadi-goobaya shaqsiyaadka lagu tuhunsan yahay inay ku lug lahaayeen falka. Mas’uuliyiinta amniga ayaa sheegay in cid kasta oo lagu helo dambigaasi la horgeyn doono sharciga.
Sidoo kale, Xeer Ilaalinta Qaranka ayaa xaqiijisay inay waddo baaritaan ku saabsan dhacdada, iyadoo sheegtay in tallaabo sharci ah laga qaadi doono qof kasta oo lagu caddeeyo inuu door ku lahaa tacaddiga loo geystay gabadha.
Kiiskan ayaa noqday mid si weyn looga hadal hayo gudaha dalka, iyadoo bulshada rayidka ah iyo ururrada haweenka ay ku baaqayaan in la xaqiijiyo caddaaladda iyo ilaalinta xuquuqda haweenka iyo carruurta.
