Wararka24: Golaha Mustaqbalka Soomaaliyeed ayaa soo bandhigay aragti cusub oo ku saabsan hannaanka doorashooyinka dalka, taas oo dhalisay dood siyaasadeed oo ku saabsan sida loo gaari karo doorasho loo dhan yahay. Qorshahan ayaa yimid xilli uu weli taagan yahay khilaafka u dhexeeya dowladda federaalka iyo mucaaradka ee la xiriira nooca doorasho ee Soomaaliya ay qaadan doonto.
Mucaaradka ayaa sheegay inuu taageersan yahay doorasho toos ah oo ku meel gaar ah, balse wuxuu carrabka ku adkeeyay in la ilaaliyo nidaamka awood-qaybsiga beelaha ee 4.5. Sida lagu sheegay war-saxaafadeedkii ay soo saareen, qorshahooda wuxuu isku dayayaa inuu isku dheellitiro codka shacabka iyo matalaadda beelaha ee muddo dheer lagu maamulayay siyaasadda dalka.
Dowladda Federaalka Soomaaliya ayaa muddooyinkii dambe xoogga saartay hirgelinta doorasho qof iyo cod ah, iyadoo ku doodaysa in shacabka ay si toos ah u doortaan wakiilladooda. Dowladda ayaa sidoo kale tilmaantay in doorashooyin toos ah oo ka dhacay qaybo ka mid ah dalka ay muujinayaan in nidaamkan la hirgelin karo.
Si kastaba ha ahaatee, falanqeeyayaal siyaasadeed ayaa sheegaya in qodobka 4.5 uu noqon karo caqabadda ugu weyn ee ka dhex taagan labada dhinac. Qaar ayaa aaminsan in nidaamkaasi uu weli muhiim u yahay isu dheellitirka siyaasadda dalka, halka kuwo kalena ay ku doodaan inuu ka hor imanayo mabda’a muwaadin kasta uu cod siman yeesho.
Wararka la helayo ayaa sidoo kale tilmaamaya in mucaaradku soo jeedinayo hannaan ay muwaadiniintu si toos ah ugu doortaan xildhibaannada, iyadoo la ilaalinayo matalaadda beelaha. Qorshaha ayaa la sheegay inuu ka hadlayo qaabka guddiyada doorashada, habka codbixinta iyo hirgelinta marxaladaha kala duwan ee geeddi-socodka doorashada.
Waxaa la filayaa in faahfaahinta buuxda ee qorshahan lagu soo bandhigo wada-hadallo siyaasadeed oo rasmi ah. Indhaha siyaasadda Soomaaliya ayaa hadda ku wajahan sida ay dowladda iyo mucaaradku uga wada hadli doonaan arrimaha doorashada iyo in la heli karo heshiis siyaasadeed oo lagu mideeyo aragtiyaha kala duwan.
