Wararka24: Ciidamada ammaanka Kenya ayaa ka hortagay weerar habeenimo oo lagu qaaday saldhig ay leeyihiin Ciidamada Difaaca Kenya (KDF) oo ku yaalla degmada Lafey ee gobolka Mandheera, sida ay sheegeen saraakiisha amniga dalkaasi.
Wararka ayaa sheegaya in koox hubeysan oo lagu qiyaasay ku dhowaad toban dagaalyahan ay weerarka ku qaadeen saldhigga fiidnimadii, iyagoo rasaas ka furay meel ku dhow xarunta ciidamada.
Ciidamada ku sugnaa saldhigga ayaa si degdeg ah uga jawaabay weerarka, waxaana halkaasi ka dhacay iska horimaad kooban oo dhexmaray labada dhinac. Sida ay sheegeen mas’uuliyiinta ammaanka, kooxdii weerarka soo qaaday ayaa dib uga guratay goobta kadib markii ay la kulmeen iska caabin xooggan.
Saraakiisha ammaanka Kenya ayaa xaqiijiyay in aanu jirin wax khasaare ah oo soo gaaray ciidamada ama saldhigga la bartilmaameedsaday, isla markaana aysan jirin askar ku dhaawacantay ama ku geeriyootay weerarka.
Dowladda Kenya ayaa sheegtay inay sare u qaadday heeganka amniga ee deegaannada ku dhow xadka Soomaaliya, iyadoo la bilaabay howlgallo lagu baadi-goobayo kooxihii ka dambeeyay weerarkaasi.
Inkasta oo aan si rasmi ah loo shaacin cidda mas’uulka ka ah weerarka, haddana saraakiisha amniga ayaa tilmaamay in qaabka loo fuliyay uu la mid yahay weerarro hore oo ay geysteen maleeshiyaadka Al-Shabaab, kuwaas oo marar badan bartilmaameedsaday xarumaha amniga iyo ciidamada Kenya.
Gobolka Mandheera oo ku yaalla xuduudda ay wadaagaan Kenya, Soomaaliya iyo Itoobiya ayaa muddo dheer la tacaalayay caqabado amni, iyadoo ciidamada Kenya ay sii wadaan dadaallada lagu sugayo ammaanka iyo xasiloonida deegaannada xadka.
