Wararka24: Wada-hadallada u dhexeeya Mareykanka iyo Iiraan ayaa la sheegay inay marayaan heerar horumarsan, iyadoo warar kasoo baxaya dhinacyada ku lugta leh ay muujinayaan in heshiis lagu dejinayo xiisadaha labada dal uu ku dhow yahay gabagabo.
Wasiirka Arrimaha Dibadda ee Iiraan, Cabbaas Araghchi, ayaa sheegay in wadahadalladu ay gaareen marxalad muhiim ah, isla markaana horumar laga sameeyay qodobbada heshiiska la isku afgartay. Wuxuu xusay in wali ay socdaan tallaabooyinka ugu dambeeya ee lagu dhammeystirayo qoraalka heshiiska.
Araghchi ayaa sidoo kale warbaahinta ugu baaqay inay ka fogaato saadaalinta ama faafinta war xaqiqi ahayn inta aan si rasmi ah loo soo gabagabeyn, isagoo sheegay in wixii go’aan rasmi ah la shaacin doono marka wada-hadalladu dhammaadaan.
Dhanka kale, Madaxweynaha Mareykanka Donald Trump ayaa dib u baahiyay hadal kasoo baxay wasiirka arrimaha dibadda ee Iiraan, tallaabadaas oo dhalisay hadal-heyn ku saabsan sida ay u socdaan xiriirrada diblomaasiyadeed ee labada dal.
Sidoo kale, Ra’iisul Wasaaraha Pakistan Shehbaz Sharif ayaa sheegay in labada dhinac ay horumar weyn ka gaareen qoraalka heshiiska, islamarkaana ay ku dhow yihiin marxaladda ugu dambeysa ee lagu soo afjarayo wada-hadallada.
Warbaahinta caalamiga ah ayaa si weyn u tabineysa horumarka laga sameeyay wada-hadalladan, iyadoo la tilmaamayo in heshiis kasta oo rasmi ah uu noqon karo tallaabo muhiim ah oo saameyn ku yeelan karta xaaladda siyaasadeed iyo amni ee Bariga Dhexe.
Falanqeeyayaal badan ayaa aaminsan in haddii heshiiska la saxiixo uu gacan ka geysan karo xiisadaha gobolka, dib u soo nooleynta xiriirka diblomaasiyadeed ee Washington iyo Tehran, iyo kor u qaadista xasilloonida gobolka.
Si kastaba, weli ma jiro heshiis si rasmi ah loo saxiixay ama loo dhaqan geliyay, waxaana dhinacyada ku lugta leh ay ku adkeysanayaan in natiijada kama dambaysta ah la sugayo inta laga dhammeynayo dhammaan qodobbada harsan.
