Wararka24: Madaxweynaha Jamhuuriyadda Federaalka Soomaaliya Xasan Sheekh Maxamuud iyo wafdi uu hoggaaminayo ayaa maanta gaaray magaalada Jowhar ee caasimadda dowlad-goboleedka Hirshabelle, halkaas oo si diirran loogu soo dhaweeyay.
Madaxweynaha iyo wafdigiisa ayaa garoonka diyaaradaha Maxamed Dheere waxaa kusoo dhaweeyay Madaxweynaha HirShabelle Cali Cabdullaahi Xuseen (Guudlaawe), mas’uuliyiin heer federaal iyo heer dowlad-goboleed ah, iyo boqolaal ka mid ah shacabka magaalada.
Safarka Madaxweynaha ayaa la xiriira daah-furka mashaariic horumarineed oo laga hirgeliyay magaalada Jowhar. Mashaariicdaas waxaa ka mid ah madaxtooyo cusub, xarumo wasaaradeed iyo waddooyin muhiim ah oo loogu talagalay horumarinta adeegyada iyo kaabeyaasha dhaqaalaha.
Jowhar waxaa sidoo kale ku sugan madax iyo mas’uuliyiin kala duwan oo ka qayb galaya munaasabadaha daah-furka iyo dhagax-dhigga mashaariic kale oo la qorsheynayo in laga hirgeliyo deegaannada HirShabelle.
Ammaanka magaalada ayaa si weyn loo adkeeyay kahor iyo kadib imaanshaha Madaxweynaha. Ciidamada ammaanka ayaa qaaday tallaabooyin dheeraad ah oo lagu xaqiijinayo nabadgelyada iyo xasilloonida inta ay socdaan booqashada iyo munaasabadaha la qorsheeyay.
Inta uu ku sugan yahay Jowhar, Madaxweyne Xasan Sheekh Maxamuud ayaa kulamo la qaadan doona madaxda HirShabelle iyo masuuliyiin kale. Kulamadaas ayaa diiradda lagu saari doonaa arrimaha amniga, horumarinta adeegyada bulshada, mashaariicda dowladda iyo xaaladda guud ee maamulka.
Safarkan ayaa qayb ka ah dadaallada dowladda federaalka ay ku xoojinayso wada shaqeynta kala dhexeysa dowlad-goboleedyada, isla markaana lagu dardar-gelinayo qorshayaasha horumarineed ee dalka.
Booqashada Madaxweynaha ayaa kusoo aadeysa xilli HirShabelle ay isku diyaarineyso geeddi-socodka doorashooyinka, iyadoo guddiga doorashada uu hore u shaaciyay jadwalka doorashada hoggaanka maamulka oo la qorsheeyay inay qabsoonto 9-ka July 2026.
