Wararka24: Wada-hadalladii la filayay inay ka furmaan magaalada Muqdisho ee lagu doonayay in xal loogu raadiyo khilaafka siyaasadeed ee u dhexeeya Dowladda Federaalka Soomaaliya iyo mucaaradka ayaa dib u dhacay muddo toddobaad ah. Dib-u-dhacan ayaa la sheegay inuu ka dhashay muran ku saabsan qaabka uu uga qaybgalayo madaxweynihii hore ee Soomaaliya, Maxamed Cabdullaahi Farmaajo.
Ilo xog-ogaal ah ayaa sheegay in Golaha Mustaqbalka Soomaaliya uu ka biyo diiday Farmaajo in uu wada-hadallada uga qayb galo isagoo matalaya dhinac siyaasadeed oo gaar ah. Golaha ayaa qaba in uu ka mid noqdo qaab-dhismeedka guud ee mucaaradka, halkii uu la imaan lahaa ajende u gaar ah.
Sida wararku sheegayaan, xubnaha mucaaradka ayaa doonaya in Farmaajo uu qayb ka noqdo guddiga farsamada ee mucaaradka si loo helo mowqif mideysan. Arrintan ayaa keentay in dib loo dhigo kulamadii qorshaysnaa, si waqti dheeraad ah loogu helo isku dubbaridka aragtida siyaasadeed ee mucaaradka.
Farmaajo ayaa tan iyo markii uu dalka dib ugu soo laabtay si madax-bannaan uga hadlayay arrimaha siyaasadda, isagoo marar badan soo saaray bayaano ka duwan kuwa ay soo saaraan xubnaha kale ee mucaaradka. Taasi ayaa dhalisay dood ku saabsan doorkiisa iyo qaabka uu uga qayb qaadanayo wada-hadallada la qorsheeyay.
Khilaafka siyaasadeed ee hadda jira ayaa salka ku haya muranka ka taagan hannaanka doorashooyinka, wax ka beddelka dastuurka iyo arrimo la xiriira muddo-xileedka dowladda. Dhinacyada siyaasadda ayaa weli ku kala aragti duwan sida loo wajihi karo marxaladda kala guurka ee dalka.
Dib-u-dhaca wada-hadallada ayaa kusoo aadaya xilli ay socdaan dadaallo diblomaasiyadeed oo lagu doonayo in dhinacyada la isugu soo dhoweeyo. Dowladda Turkiga ayaa ka mid ah dhinacyada wada dadaallada lagu qaboojinayo xiisadda siyaasadeed, iyadoo kulamo kala duwan la yeelatay madaxda dowladda iyo xubnaha mucaaradka.
Beesha caalamka ayaa sidoo kale ku baaqday in dhinacyada Soomaaliyeed ay khilaafkooda ku xalliyaan wada-hadal iyo is-afgarad. Waxaa la filayaa in toddobaadyada soo socda ay caddeyn doonaan in dhinacyadu gaari karaan heshiis horseeda wada-hadal rasmi ah iyo xal siyaasadeed oo waara.
