Wararka24: Wasaaradda Arrimaha Dibadda ee Turkiga ayaa Danjire Ferhat Alkan u magacowday safiirka cusub ee dalkaasi u fadhiya Soomaaliya. Magacaabistan ayaa qayb ka ah isbeddello diblomaasiyadeed oo ay Ankara ku sameysay qaar ka mid ah safaaradaheeda dibadda.
Danjire Ferhat Alkan ayaa beddelaya safiirkii hore ee Turkiga ee Muqdisho, Alper Aktaş, kaas oo loo wareejiyay xilka safiirka Turkiga ee Waqooyiga Macedonia. Wareegto kasoo baxday Wasaaradda Arrimaha Dibadda Turkiga ayaa lagu xaqiijiyay isbeddelkan cusub.
Safiirka cusub ayaa leh waayo-aragnimo dheer oo dhinaca diblomaasiyadda ah, isagoo ku biiray Wasaaradda Arrimaha Dibadda Turkiga sanadkii 2001. Mudadii uu shaqeynayay, wuxuu xilal kala duwan kasoo qabtay safaaradaha Turkiga ee dalal dhowr ah.
Ferhat Alkan ayaa hore uga soo shaqeeyay safaaradaha Turkiga ee Kabul iyo Washington, sidoo kalena wuxuu noqday Qunsulka Guud ee Turkiga ee Houston iyo la-taliye sare oo ka tirsan safaaradda Turkiga ee Beijing. Kahor magacaabistiisa Soomaaliya, wuxuu ahaa safiirka Turkiga ee Mozambique.
Danjiraha cusub ayaa waxbarashadiisa sare ku qaatay culuumta xiriirka caalamiga ah iyo daraasaadka Yurub. Khibraddiisa diblomaasiyadeed ayaa lagu tilmaamay mid ka mid ah sababaha loo doortay inuu hoggaamiyo safaaradda Turkiga ee Soomaaliya.
Magacaabistan ayaa kusoo beegmaysa xilli Turkiga uu sii xoojinayo xiriirka uu la leeyahay Soomaaliya. Labada dal ayaa iskaashi dhow ka leh dhinacyada amniga, dhaqaalaha, caafimaadka, waxbarashada iyo horumarinta kaabeyaasha dhaqaalaha.
Turkiga ayaa sanadihii la soo dhaafay door muuqda ku lahaa Soomaaliya, isagoo taageero ka geystay mashaariic horumarineed iyo dadaallo lagu xoojinayo hay’adaha dowladda. Waxaa sidoo kale socda iskaashi ku saabsan arrimaha tamarta, maalgashiga iyo xal u raadinta caqabadaha siyaasadeed ee dalka.
Magacaabista Ferhat Alkan ayaa la filayaa inay sii xoojiso xiriirka diblomaasiyadeed iyo iskaashiga u dhexeeya Ankara iyo Muqdisho, xilli labada dhinac ay muujinayaan rabitaan ay ku ballaarinayaan wada shaqeynta mustaqbalka.
