Wararka24: Madaxweynaha Mareykanka, Donald Trump, ayaa sheegay inuu wada hadal dhanka telefoonka ah la yeeshay Ra’iisul Wasaaraha Israel, Benjamin Netanyahu, isaga oo ugu baaqay in laga fogaado tallaabooyin militari oo cusub oo ka dhan ah Iran. Hadalkan ayaa yimid kadib weerar gantaallo ah oo Iran ay ku qaaday waqooyiga Israel.
Trump ayaa warbaahinta Mareykanka u sheegay in weerarka Iran aanu sababin khasaaro weyn, taasina ay tahay sababta uu Israel uga rajeynayo inaysan qaadin weerar aargoosi ah. Wuxuu xusay in xaaladda hadda jirta ay u baahan tahay dadaallo diblomaasiyadeed halkii laga dooran lahaa tallaabooyin militari oo sii hurin kara xiisadda gobolka.
Madaxweynaha Mareykanka ayaa sidoo kale sheegay inuu Iran u soo bandhigi doono heshiis cusub oo looga gol leeyahay in lagu yareeyo xiisadaha laguna soo afjaro colaadaha ka jira Bariga Dhexe. Trump ayaa muujiyay rajo ah in xal siyaasadeed la gaari karo haddii dhinacyadu muujiyaan dabacsanaan.
Weerarka Iran ayaa dhacay kadib xiisado sii kordhayay oo la xiriiray dagaallada ka socda Lubnaan iyo weerarro is daba joog ah oo dhex maray xulafada labada dhinac. Saraakiisha Iran ayaa sheegay in weerarkooda uu jawaab u ahaa falal militari oo ay Israel ka fulisay gudaha Lubnaan.
Dhanka kale, kooxda Kataib Hezbollah ee Ciraaq ayaa uga digtay Mareykanka inuu si toos ah ugu lug yeesho khilaafka Iran iyo Israel. Kooxda ayaa sheegtay in saldhigyada iyo danaha Mareykanka ee gobolka ay halis geli karaan haddii Washington ay faragelin militari sameyso.
Iran ayaa hore u sheegtay in xasilloonida Lubnaan ay muhiim u tahay dadaal kasta oo lagu doonayo in lagu soo afjaro colaadaha gobolka. Mas’uuliyiinta Tehran ayaa ku adkeystay in heshiis kasta oo cusub uu ku xirnaan doono xaaladda amni iyo siyaasadeed ee gobolka.
Trump ayaa dhankiisa ku celiyay in heshiis diblomaasiyadeed uu weli suurtagal yahay, isaga oo sheegay in rajada lagu gaari karo xal siyaasadeed ay weli jirto. Hadalladiisa ayaa kusoo aadaya xilli ay sii kordhayaan walaacyada laga qabo in xiisadda Iran iyo Israel ay isu beddesho isku dhac ballaaran oo gobolka oo dhan saameeya.
