Wararka24: Warar ay daabacday warbaahinta Yedioth Ahronoth ee Israel ayaa sheegtay in Madaxweynaha Somaliland, Cabdiraxmaan Maxamed Cabdullaahi Cirro, la filayo inuu booqasho ku tago Israel toddobaadka soo socda. Wararkaasi ayaa tilmaamay in safarka la qorsheeyay inuu dhaco inta u dhexeysa 15-ka illaa 17-ka Juun, inkastoo aan weli jirin xaqiijin rasmi ah oo ka soo baxday Somaliland ama Israel.
Sida lagu sheegay warbixinnada la daabacay, Cirro ayaa la filayaa inuu kulamo la yeesho Madaxweynaha Israel, Isaac Herzog, iyo Ra’iisul Wasaaraha Israel, Benjamin Netanyahu. Wararka ayaa sidoo kale xusay in ajandaha ugu muhiimsan ee booqashada lagu sheegay furitaanka safaarad ay Somaliland ku yeelan karto magaalada Qudus.
Wargeysyada ayaa sheegay in laba safar oo hore oo la qorsheeyay ay dib u dhaceen sababo kala duwan awgood. Hase yeeshee, ma jiraan faahfaahin rasmi ah oo labada dhinac ay ka bixiyeen qorshaha cusub ee la sheegay.
Arrintan ayaa imanaysa kadib markii Israel ay bishii Diseembar ee sanadkii hore noqotay dalkii ugu horreeyay ee si rasmi ah u aqoonsada Somaliland. Tallaabadaas ayaa xilligaas dhalisay falcelin siyaasadeed oo kala duwan, gaar ahaan dhinaca Dowladda Federaalka Soomaaliya.
Dowladda Soomaaliya ayaa hore u muujisay diidmadeeda aqoonsiga ay Israel siisay Somaliland, iyadoo ku tilmaantay mid ka hor imaanaysa madax-bannaanida iyo midnimada dhuleed ee dalka. Madaxweyne Xasan Sheekh Maxamuud ayaa sidoo kale cambaareeyay wararkii hore ee la xiriiray suurtagalnimada furitaanka safaarad ku taalla Qudus.
Dhanka kale, Ururka Iskaashiga Islaamka ee OIC ayaa marar hore walaac ka muujiyay wararka la xiriira qorshe kasta oo safaarad looga furayo Qudus. Qudus ayaa weli ka mid ah qodobbada ugu muranka badan ee khilaafka u dhexeeya Israel iyo Falastiin, iyadoo inta badan dalalka caalamka ay safaaradahooda ku leeyihiin Tel Aviv iyo hareeraheeda.
