Wararka24: Ciidanka Booliska Soomaaliya ayaa maanta aagga Mirinaayo ee degmada Cabdicasiis ku soo bandhigay gaadiid dagaal iyo hub culus, kadib howlgal ay ciidamada ammaanku ka fuliyeen deegaankaas oo maalmihii la soo dhaafay ay ka jireen xiisado amni.
Wararka laga helayo goobta ayaa sheegaya in la soo bandhigay dhowr gaari oo nooca dagaalka ah iyo hub kala duwan oo ay hay’adaha ammaanku sheegeen in lagu qabtay howlgalka. Ciidamo badan oo amniga sugaya ayaa sidoo kale ku sugan deegaanka si loo xakameeyo xaaladda jirta.
Taliyaha Qaybta Guud ee Booliska Gobolka Banaadir, Macallin Mahdi, ayaa gaaray goobta lagu soo bandhigay qalabkaasi. Mas’uuliyiinta ammaanka ayaa la filayaa inay faahfaahin dheeraad ah ka bixiyaan halka laga helay hubka iyo gaadiidka la soo bandhigay iyo baaritaannada socda.
Howlgalkan ayaa yimid maalin kadib markii Sheekh Shariif Sheekh Axmed uu ka guuray gurigii uu deganaa ee ku yaallay deegaanka Mirinaayo. Wararka ayaa tilmaamaya in tallaabadaasi ay daba socotay wada-hadallo dhex maray dhinacyo kala duwan oo ku lug leh xaaladda siyaasadeed ee taagan.
Dowladda Federaalka ayaa horey u soo bandhigtay hub kale oo lagu qabtay howlgallo amni oo ka dhacay magaalada Muqdisho, iyadoo sheegtay in ujeeddada howlgaladaasi ay tahay sugidda amniga iyo ururinta hubka aan sharciga waafaqsaneyn.
Dhanka kale, dhacdooyinkan ayaa kusoo beegmaya xilli ay weli taagan tahay xiisad siyaasadeed iyo mid amni oo saameyn ku leh qaybo ka mid ah caasimadda. Dadaallo dhexdhexaadin ah ayaa weli socda si loo dejiyo xaaladda loona xoojiyo xasilloonida magaalada Muqdisho.
