Wararka24: Ergo uu diray Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa gaaray hoyga uu magaalada Muqdisho ka degan yahay madaxweynihii hore ee Soomaaliya Sheekh Shariif Sheekh Axmed, iyadoo ay socdaan dadaallo lagu dejinayo xiisadda siyaasadeed ee ka taagan caasimadda.
Ergada ayaa waxaa hoggaaminayay Ugaas Maxamuud Cali Ugaas, waxaana ka mid ahaa Senator Cabdi Axmed Dhuxuloow (Dhagdheer), Xildhibaan Yuusuf Geelle Ugaas iyo mas’uuliyiin kale. Kulanka ayaa ka dhacay guriga Sheekh Shariif ee ku yaalla agagaarka xeebta Liido, halkaas oo maalmihii u dambeeyay ay ka socdeen kulamo iyo abaabul siyaasadeed.
Senator Cabdi Axmed Dhuxuloow ayaa xaqiijiyay socdaalka ergada, isagoo si kooban u sheegay in ay u tageen Sheekh Shariif sidii loo sii ambaqaadi lahaa dadaallada wada-hadalka iyo is-afgaradka. Faahfaahin dheeraad ah lagama bixin waxyaabaha sida gaarka ah looga hadlayo kulanka.
Wararka la helayo ayaa tilmaamaya in labada dhinac ay ka wada hadlayaan sidii loo yareyn lahaa xiisadda siyaasadeed ee ka dhalatay muranka ku saabsan dibadbaxa mucaaradka iyo arrimo kale oo la xiriira hannaanka siyaasadeed ee dalka.
Mucaaradka ayaa weli ku adkeysanaya qorshahooda ku aaddan qabashada dibadbax ay sheegeen inuu noqon doono mid nabadeed, halka dowladda ay hore u sheegtay inay oggol tahay isu soo baxa balse ay u qoondeysay goobo gaar ah oo lagu qabto.
Dadaalladan dhex-dhexaadinta ah ayaa kusoo aadaya xilli magaalada Muqdisho laga dareemayo dhaqdhaqaaqyo amni oo sii kordhaya. Ciidamo dheeraad ah ayaa lagu arkayay qaybo ka mid ah caasimadda, iyadoo shacabka ay walaac ka muujinayaan suurtagalnimada in xiisadda siyaasadeed ay saameyn ku yeelato amniga guud ee magaalada.
Si kastaba, kulanka u dhexeeya ergada madaxweynaha iyo Sheekh Shariif ayaa loo arkaa tallaabo muujinaysa dadaallada lagu raadinayo xal siyaasadeed iyo in la yareeyo xiisadaha taagan. Indhaha shacabka iyo daneeyayaasha siyaasadda ayaa hadda ku sii jeeda natiijada ka soo baxda wada-hadalladan.
