Wararka24: Hay’adda Sirdoonka iyo Nabadsugidda Qaranka Soomaaliyeed (NISA) ayaa sheegtay in laba howlgal oo qorsheysan oo laga fuliyay deegaanno ka tirsan HirShabeelle lagu dilay 29 xubnood oo ka tirsanaa Al-Shabaab, kuwaas oo ay ku jireen horjoogeyaal iyo dagaalyahanno ka tirsan kooxda.
Qoraal ay soo saartay NISA ayaa lagu sheegay in howlgalka koowaad uu ka dhacay deegaanka Masaajid Cali Gaduud ee gobolka Shabeellaha Dhexe. Sida lagu sheegay bayaanka, goobta la weeraray waxaa ku sugnaa xubno ka tirsan Al-Shabaab oo waday abaabullo iyo dhaqdhaqaaqyo la xiriira amniga gobolka.
Hay’addu waxay sheegtay in howlgalkaas lagu dilay 23 xubnood oo ka tirsan kooxda, kadib markii la helay xog sirdoon oo horseeday in la beegsado goobta ay ku sugnaayeen. NISA ayaa xustay in xubnahaasi ay ku howlnaayeen qorsheyaal lagu carqaladeynayay amniga deegaannada Hirshabeelle.
Howlgalka labaad ayaa ka dhacay deegaanka Buq-aqable ee gobolka Hiiraan. NISA ayaa sheegtay in halkaasi lagu dilay lix xubnood oo kale, kuwaas oo uu ku jiray horjooge lagu magacaabi jiray Cabdiraxmaan Cabdi Mudallib.
Sida lagu sheegay bayaanka, horjoogahan ayaa Al-Shabaab u qaabilsanaa abaabulka iyo qorsheynta qaraxyada ka dhaca gobolka Hiiraan. Hay’addu waxay ku eedeysay inuu door ku lahaa weerarro iyo falal amni darro oo hore uga dhacay degmooyinka Buulo-burde iyo Jalalaqsi.
NISA ayaa sheegtay in howlgaladan ay ka fuliyeen iyagoo kaashanaya saaxiibada caalamiga ah, isla markaana ay qayb ka yihiin dadaallada joogtada ah ee lagu beegsanayo hoggaamiyeyaasha iyo xubnaha Al-Shabaab ee ka howlgala gobollada dalka.
Dowladda Federaalka Soomaaliya ayaa muddooyinkii dambe xoojisay howlgallada milatari iyo kuwa sirdoon ee ka socda gobollada dhexe iyo koonfurta dalka, iyadoo ujeedadu tahay in la wiiqo awoodda Al-Shabaab, lana xoojiyo amniga iyo xasilloonida deegaannada laga saaray kooxda.
