Wararka24: Dowladda Mareykanka ayaa mar kale caddeysay inay aqoonsan tahay madaxbannaanida, midnimada iyo wadajirka dhuleed ee Jamhuuriyadda Federaalka Soomaaliya, iyadoo warbixin rasmi ah oo loo gudbiyay Kongareeska Mareykanka lagu sheegay in Somaliland loo arko maamul ka tirsan Soomaaliya.
Warbixinta ayaa faahfaahin ka bixisay meelaha ay Washington u aragto inay suurtagal tahay in laga xoojiyo wada-shaqeynta Somaliland, gaar ahaan dhinacyada amniga, dhaqaalaha iyo horumarinta kaabeyaasha muhiimka ah. Dowladda Mareykanka ayaa sheegtay in goobta juqraafiyeed ee Somaliland ay muhiimad weyn u leedahay danaha istiraatiijiyadeed ee gobolka Geeska Afrika iyo marin-biyoodka Badda Cas.
Sidoo kale, warbixintu waxay xustay in Somaliland ay door ka qaadan karto dadaallada lagu xoojinayo amniga gobolka, gaar ahaan la socodka khataraha la xiriira kooxaha hubeysan iyo sugidda amniga marinada muhiimka ah ee ganacsiga caalamiga ah.
Mareykanka ayaa tilmaamay in xiriirka dhinaca amniga uu ka koobnaan karo wadaagista xogaha, tababarrada ciidamada iyo taageeridda dadaallada lagu ilaalinayo xeebaha iyo marin-biyoodka gobolka. Warbixintu waxay sidoo kale sheegtay in hay’adaha amniga Mareykanka ay sii wadaan qiimeynta fursadaha iskaashi ee mustaqbalka.
Dhanka kale, waxaa la sheegay in Safaaradda Mareykanka ee Muqdisho ay sii waddo booqashooyin iyo kulamo ay la yeelato mas’uuliyiinta Somaliland, kuwaas oo looga hadlayo arrimo la xiriira amniga, dhaqaalaha, gargaarka bani’aadannimo iyo horumarinta adeegyada bulshada.
Warbixintu waxay sidoo kale iftiimisay muhiimadda dekedda Berbera iyo garoonka diyaaradaha ee magaaladaas, iyadoo lagu tilmaamay xarumo leh fursado maalgashi iyo ganacsi oo muhiim u noqon kara gobolka. Waxaa si gaar ah loo xusay doorka ay dekeddu ka ciyaari karto isku xirka ganacsiga dalalka aan lahayn xeebaha.
Inkasta oo warbixintu muujisay muhiimadda Somaliland ee dhinacyada amniga iyo dhaqaalaha, haddana dawlada Mareykanka waxay si cad u sheegtay in siyaasadda rasmiga ah ee Mareykanka aysan isbeddelin, isla markaana Washington ay weli taageersan tahay Soomaaliya mideysan oo leh hal dowlad iyo hal qaran.
