Turkiga ayaa sheegtay in dalal badan oo Afrikaan ah ay doonayaan inay la yeeshaan xiriir u eg midka ay Ankara la leedahay Soomaaliya, kaas oo isku daraya taageero amni, tababar ciidan, maalgashi dhaqaale iyo iskaashi istaraatiiji ah.
Wasiirka Difaaca Turkiga Yasar Guler ayaa sheegay in dowlado dhowr ah ay codsadeen in lagu taageero qaab la mid ah midka Turkigu ka hirgeliyay Soomaaliya. Wuxuu xusay in Ankara ay sii waddo tababarka iyo taageerada farsamo ee ay siiso ciidamada dalalka Afrika.
Xiriirka Soomaaliya iyo Turkiga ayaa si weyn u billowday sanadkii 2011 kadib booqashadii Recep Tayyip Erdogan ee Muqdisho xilli dalka uu wajahayay abaar iyo xaalad bani’aadannimo oo adag. Iskaashigaas ayaa markii dambe isu beddelay mid dhinacyo badan leh oo ay ku jiraan amniga, dhaqaalaha, caafimaadka iyo waxbarashada.
Turkiga ayaa Soomaaliya ka hirgeliyay mashaariic kala duwan oo ay ku jiraan isbitaallo, iskuullo iyo kaabeyaasha dhaqaalaha, wuxuuna sidoo kale Muqdisho ka furtay saldhiggiisa militari ee ugu weyn dibadda sanadkii 2017.
Qaabka hadda loogu yeerayo “Somalia Model” ayaa lagu tilmaamaa hannaan uu Turkigu marka hore ku taageero amniga iyo xasilloonida, kadibna uu u gudbo maalgashi dhaqaale iyo horumarinta adeegyada bulshada.
Warbixin ay daabacday Middle East Eye ayaa sheegtay in dalal dhowr ah oo Afrikaan ah ay xiiseynayaan qaabkan, gaar ahaan kuwa wajahaya amni darro iyo dhaqaale xumo.
Dalalka lagu sheegay inay muujinayaan xiisahaas waxaa kamid ah qaar ka tirsan gobolka Saaxilka sida Niger iyo Burkina Faso, halka sidoo kale la xusay Ethiopia iyo Sudan.
Xiriirka Ankara iyo Muqdisho ayaa galay marxalad cusub kadib heshiisyo difaac iyo dhaqaale oo labada dal kala saxiixdeen sanadkii 2024, kuwaas oo la xiriira amniga badda, ilaalinta xeebaha iyo sahminta shidaalka iyo gaaska.
Turkiga ayaa sidoo kale lagu warramay inuu qorsheynayo xarun hawada sare ah oo laga hirgeliyo Soomaaliya, inkastoo aan wali la shaacin faahfaahin rasmi ah oo buuxda.
Horumarkan ayaa kusoo aadaya iyadoo loollanka siyaasadeed iyo istaraatiijiga ah ee Geeska Afrika iyo Badda Cas uu sii xoogeysanayo, gaar ahaan marka la eego amniga badda, shidaalka iyo saameynta quwadaha shisheeye ee gobolka.
