Wararka24: Maxkamadda Sare ee Kenya ayaa soo saartay amar ku meel gaar ah oo lagu joojinayo qorshe kasta oo la xiriira dhismaha ama howlgelinta xarumo loogu talagalay karantiilka iyo daaweynta dadka qaba cudurka Ebola.
Go’aanka maxkamadda Milimani High Court ayaa yimid kadib dacwad ay gudbisay hay’adda Katiba Institute, taas oo walaac ka muujisay badqabka shacabka iyo heshiisyo la sheegay inay dowladda Kenya la gashay dowlado shisheeye oo ku saabsan arrimaha Ebola.
Amarka maxkamadda ayaa si gaar ah u mamnuucaya in dowladda Kenya ama hay’adaha la shaqeeya ay dalka soo geliyaan ama qaabilaan dad qaba ama looga shakisan yahay cudurka Ebola ilaa dacwadda si rasmi ah looga dhageysanayo maxkamadda.
Dhanka kale, Xoghayaha Arrimaha Dibadda Mareykanka Marco Rubio ayaa khadka telefoonka kula hadlay Madaxweynaha Kenya William Ruto, iyagoo ka wada hadlay xaaladda Ebola iyo iskaashiga caafimaad ee labada dal.
War kasoo baxay Wasaaradda Arrimaha Dibadda Mareykanka ayaa lagu sheegay in labada dhinac ay isla soo qaadeen xoojinta nidaamka caafimaadka Kenya iyo diyaarinta agabka caafimaad ee muhiimka ah.
Mareykanka ayaa sidoo kale shaaciyay inuu Kenya siin doono taageero dhan $13.5 milyan oo loogu talagalay diyaar-garowga cudurka Ebola, halka horey loo ballanqaaday in ka badan $112 milyan oo taageero oo loogu talagalay la dagaallanka cudurkaasi.
Labada dowladood ayaa isku raacay inay sii xoojiyaan wada shaqeynta la xiriirta ka hortagga faafitaanka Ebola ee gobolka Bariga Afrika, xilli ay jirto cabsi laga qabo in cudurka uu ku faafo dalal horleh oo gobolka ku yaalla.
