Wararka24: Madaxweynaha Mareykanka Donald Trump ayaa mar kale hadallo kulul ka jeediyay bulshada Soomaalida ku nool gobolka Minnesota iyo xildhibaanad Ilhan Omar, xilli maamulka Aqalka Cad uu sii xoojinayo siyaasadaha la xiriira socdaalka iyo la dagaallanka musuqmaasuqa.
Trump oo ka hadlayay kulan Golaha Wasiirrada ah ayaa Soomaalida ku tilmaamay “tuugo”, isaga oo si gaar ah u weeraray Ilhan Omar oo asal ahaan Soomaali ah. Madaxweynaha ayaa sheegay in dowladdiisu ay waddo cadaadis xooggan oo ka dhan ah dadka lagu tuhunsan yahay inay ku lug leeyihiin lunsashada hantida dadweynaha.
Hadalka Trump ayaa kusoo aadaya kadib markii saraakiisha federaalka ay kordhiyeen baaritaannada la xiriira fadeexado dhaqaale oo ka dhacay gobolka Minnesota, kuwaas oo qaarkood lala xiriiriyay Soomaali-Mareykan. Warbixino hore ayaa sheegay in tobannaan qof lagu soo oogay dacwado la xiriira khiyaanooyin lagu sameeyay barnaamijyo dowladda Mareykanka bixisay xilligii Covid-19.
Dhanka kale, Ilhan Omar ayaa si adag uga jawaabtay hadallada Trump, iyadoo ku tilmaantay kuwo xanbaarsan naceyb, midab-takoor iyo weerar lagu hayo bulshada Muslimiinta iyo dadka madow. Waxay sheegtay in hadallada noocan ah ay cabsi ku abuuri karaan bulshada Soomaalida ee ku nool Mareykanka.
Bulshada Soomaalida ee Minnesota ayaa ah tan ugu weyn Soomaalida ku nool Mareykanka, waxayna sanadihii dambe yeesheen saameyn siyaasadeed iyo mid bulsho oo sii kordheysa. Hoggaamiyeyaal badan oo deegaanka ah ayaa hore uga digay in hadallada siyaasiyiinta qaarkood ay sii hurin karaan cadaawadda loo qabo muhaajiriinta iyo bulshada laga tirada badan yahay.
Hadalladan cusub ayaa imanaya xilli Mareykanka uu wajahayo dood xooggan oo ku saabsan socdaalka, amniga gudaha iyo sida loo wajahayo kiisaska musuqmaasuqa ee lala xiriirinayo qaar kamid ah hay’adaha gargaarka bulshada.
