Wararka24: Khilaaf siyaasadeed oo xooggan ayaa la sheegay inuu soo kala dhex-galay Madaxweynaha Soomaaliya Xasan Sheekh Maxamuud iyo Agaasimaha Hay’adda Nabadsugidda iyo Sirdoonka Qaranka ee NISA, Mahad Maxamed Salaad, kaas oo salka ku haya arrimaha doorashada dowlad-goboleedka Galmudug.
Warar lagu kalsoon yahay oo ay heshay Wararka24 ayaa sheegaya in Mahad Salaad uu Madaxweynaha si cad ugu sheegay inuu doonayo inuu isu sharaxo xilka madaxweynaha Galmudug, isla markaana aanu taageersaneyn qorshe kasta oo lagu cadaadinayo madaxweynaha hadda xilka haya ee Axmed Cabdi Kaariye Qoor-Qoor.
Mahad Salaad ayaa la sheegay inuu aaminsan yahay in xal siyaasadeed iyo wada-hadal lagu gaari karo arrinta Galmudug, isaga oo ku dooday in Qoor-Qoor lagu qancin karo tanaasul siyaasadeed, halkii loo adeegsan lahaa awood ciidan ama cadaadis siyaasadeed oo toos ah.
Ilo xog-ogaal ah ayaa sidoo kale tilmaamay in kulamo dhowr ah oo dhexmaray Xasan Sheekh iyo Mahad Salaad ay kusoo dhammaadeen is-afgaranwaa, iyadoo aan weli heshiis rasmi ah laga gaarin khilaafka taagan. Wararka ayaa sheegaya in labada dhinac ay weli qorsheynayaan kulamo kale oo lagu sii ambaqaadayo wadahadallada.
Mahad Salaad ayaa la sheegay inuu doonayo in doorashada Galmudug ay noqoto mid furan oo ay musharrixiintu si siman ugu tartamaan, halka Madaxweyne Qoor-Qoor uu isna muujiyay inuu taageersan yahay hannaan doorasho oo hufan oo lagu wada qanacsan yahay.
Dhanka kale, Ra’iisul Wasaaraha Soomaaliya Xamza Cabdi Barre ayaa lagu warramayaa inuu taageersan yahay mowqifka Mahad Salaad, isla markaana aanu ku qanacsaneyn qorshaha la sheegay in Madaxweyne Xasan Sheekh uu ku taageerayo Liibaan Shuluq si uu ugu soo baxo madaxtinimada Galmudug.
Khilaafkan cusub ayaa saameyn ku yeeshay dhaq-dhaqaaqyada siyaasadeed ee ka socda magaalada Dhuusamareeb, halkaas oo ay ka socdaan kulamo siyaasadeed iyo abaabulo la xiriira doorashada maamulka Galmudug. Siyaasiyiin badan oo kasoo jeeda maamulkaasi ayaa muujiyay walaac ku aaddan suurta-galnimada xiisado siyaasadeed oo cusub.
Dowladda Federaalka Soomaaliya ayaan weli si rasmi ah uga hadlin wararka ku saabsan khilaafka la sheegay inuu u dhexeeyo Madaxweyne Xasan Sheekh Maxamuud iyo Agaasimaha NISA Mahad Maxamed Salaad, xilli ay sii kordhayaan hadal-heynta la xiriirta loolanka siyaasadeed ee Galmudug.
