Wararka24: Madaxweynaha Jubbaland, Axmed Maxamed Islaam Axmed Madoobe, ayaa maanta khudbad uu ka jeediyay magaalada Kismayo kadib salaaddii Ciidda si adag ugu weeraray Madaxweyne , Xasan Sheekh Maxamuud iyo Dowladda Federaalka somaaliya.
Axmed Madoobe ayaa ku eedeeyay dowladda federaalka inay ku fashilantay hoggaaminta dalka iyo ilaalinta wada-shaqeynta siyaasadeed, isaga oo sheegay in dowladda dhexe ay lumisay kalsoonidii siyaasadeed ee ay ku lahayd dhinacyada kale ee dalka.
Axmed Madoobe ayaa sidoo kale sheegay in nidaamka hadda jira uu ka baxay wadatashigii iyo heshiisyadii siyaasadeed ee hore loogu maamuli jiray arrimaha masiiriga ah ee Soomaaliya.
Khudbaddiisa ayuu si gaar ah ugu dhaliilay qorshaha doorashada qof iyo cod ee ay waddo dowladda federaalka, isaga oo ku tilmaamay hannaan aan weli diyaar u ahayn hirgelin dhab ah, islamarkaana horseedi kara “doorasho dabran” oo horay loogu sii qorsheeyo cidda xilalka qabaneysa.
Sidoo kale, Axmed Madoobe ayaa ka hadlay xaaladda Muqdisho, isaga oo sheegay in shacabka qaar laga barakiciyay magaalada, isla markaana uu la wadaagayo walaaca iyo dhibaatada ay wajahayaan dadka ku nool caasimadda.
Wuxuu sidoo kale eedeyn u jeediyay kooxo uu ku tilmaamay “dhul-boobayaal”, isaga oo sheegay inay jiraan dad sharciyeynaya dhul si sharci darro ah lagu qaatay, arrintaas oo uu sheegay inay khatar ku tahay xasilloonida bulshada.
Axmed Madoobe ayaa ugu baaqay Madaxweyne Xasan Sheekh inuu dib u mideeyo dhinacyada siyaasadda ee dalka, kana tanaasulo khilaafaadka sii kala fogeynaya dowladda federaalka, dowlad-goboleedyada iyo mucaaradka.
Hadalka Madaxweynaha Jubbaland ayaa kusoo aadaya xilli uu sii xoogeysanayo muranka siyaasadeed ee ka taagan Soomaaliya, kaas oo salka ku haya arrimaha doorashooyinka, wax-ka-beddelka dastuurka iyo hannaanka siyaasadeed ee dalka.
