Wararka24: Dowladda Federaalka Soomaaliya ayaa sheegtay inay filayso natiijooyin rajo leh dhammaadka sanadkan, kadib markii si rasmi ah loo billaabay qodista shidaalka iyo gaaska xeebaha Soomaaliya, iyadoo mashruucaasi ay iska kaashanayaan Soomaaliya iyo Turkey.
Wasiirka Batroolka iyo Macdanta Soomaaliya, Daahir Shire Maxamed, ayaa sheegay in iskaashiga labada dal uu galay marxalad cusub oo ah qodista ceelasha shidaalka, kadib markii la soo gabagabeeyay sahankii dhul-badeedka iyo falanqeynta xogihii laga helay.
“Wadashaqeynta Soomaaliya iyo Turkiga ee dhinaca hydrocarbons-ka waxay hadda gashay marxaladdii labaad, taas oo ah qodista,” ayuu wasiirku u sheegay wakaaladda Anadolu.
Markabka qodista shidaalka ee Çağrı Bey ayaa bishii hore gaaray xeebaha Muqdisho si uu u bilaabo qodista ceelka Curad-1, oo la filayo inuu gaaro qoto dhan 7,500 mitir.
Wasiirka ayaa sheegay in dowladda Soomaaliya ay rajo wanaagsan ka qabto in dhammaadka sanadkan la helo natiijooyin muujinaya suurtagalnimada shidaal ama gaas ganacsi ahaan loo soo saari karo, inkastoo uusan sheegin qiyaasta kaydka laga filayo.
Sidoo kale, wuxuu tilmaamay in mashruucan uu door weyn ka qaadan karo kobaca dhaqaalaha dalka, shaqo abuurka iyo soo jiidashada maalgashiga shisheeye, haddii la xaqiijiyo jiritaanka kayd shidaal iyo gaas oo la soo saari karo.
Wasiirka ayaa xusay in heshiiska Soomaaliya iyo Turkiga aanu ku koobnayn sahminta shidaalka oo keliya, balse uu sidoo kale xoogga saarayo tababarro iyo dhisidda khibradda farsamo ee Soomaalida, si mustaqbalka ay ula wareegaan howlaha ay hadda wadaan khubarada shisheeye.
Mashruucan ayaa daba socda sahanno uu horey uga sameeyay badda Soomaaliya markabka seismic-ka ee Oruç Reis, kaas oo xog ururin ka sameeyay qaybo kamid ah biyaha Soomaaliya.
Howsha qodista ayaa la filayaa inay socoto muddo u dhexeysa lix ilaa sagaal bilood, iyadoo lagu saleynayo xaaladaha cimilada iyo badda, waxaana mashruucan loo arkaa mid muhiim u ah mustaqbalka tamarta iyo dhaqaalaha Soomaaliya.
