Wararka24: Xafiiska Hantidhowrka Guud ee Soomaaliya iyo Maxkamadda Xisaabaadka Turkiga ayaa si wadajir ah magaalada Ankara uga furay tababar aqoon is weydaarsi ah oo ku saabsan baarista u hoggaansanaanta sharciga. Tababarkan ayaa qeyb ka ah xoojinta iskaashiga labada dhinac.
Waxaa ka qeyb galaya hawl wadeeno ka socda Xafiiska Hantidhowrka Guud iyo xafiisyada hantidhowrka dowlad goboleedyada dalka. Ujeeddada tababarka ayaa ah kor u qaadista aqoonta iyo xirfadaha la xiriira baarista iyo la socodka u hoggaansanaanta sharciga.
Ku xigeenka Hawlaha Baarista ee Maxkamadda Xisaabaadka Turkiga Ahmet Tezcan ayaa sheegay in hay’addiisu ay sii wadi doonto taageerada ay siiso Soomaaliya. Wuxuu xusay muhiimadda ay leedahay horumarinta xirfadaha iyo iskaashiga mihnadeed.
Dhankiisa, Ku xigeenka Hantidhowraha Guud ee Soomaaliya Cabdijamaal Ismaaciil Maxamed ayaa uga mahadceliyay Turkiga martigelinta tababarka. Wuxuu tilmaamay in fursadaha noocan ah ay sare u qaadaan tayada shaqada iyo is dhaafsiga khibradaha.
Mas’uuliyiinta ayaa sheegay in tababarkan uu qeyb ka yahay dadaallo lagu horumarinayo hay’adaha dowladda ee dhinaca isla xisaabtanka iyo hufnaanta. Waxaa la xusay in la doonayo in la xoojiyo nidaamka maaliyadeed ee dalka.
Xafiiska Hantidhowrka Guud ayaa door muhiim ah ka qaata hubinta daahfurnaanta iyo isla xisaabtanka hay’adaha dowladda, iyadoo tababarkan uu gacan ka geysanayo xoojinta waajibaadkaas.
