Wararka24: Muddo xileedkii Golaha Baarlamaanka Federaalka Soomaaliya ayaa si rasmi ah u dhammaaday maanta oo ku beegan 14-ka April, sida uu dhigayo dastuurka ku meel gaarka ah. Dhamaadka muddadan ayaa calaamad u ah marxalad cusub oo siyaasadeed oo dalka galay.
Baarlamaanka, oo ah hay’adda sharci dejinta ugu sarreysa, ayaa afartii sano ee la soo dhaafay hayay awoodda dejinta sharciyada iyo kormeerka xukuumadda. Inta lagu jiray muddadaas, waxaa laga soo farcamay hay’adaha kale ee dowladda, oo ay ku jirto madaxtooyada iyo xukuumadda.
Khubarada siyaasadda ayaa sheegaya in dhamaadka muddo xileedka uu saameyn ku yeelan karo shaqada guud ee hay’adaha dowladda. Waxay tilmaamayaan in dalka uu geli karo xaalad ku meel gaar ah oo xaddidi karta awoodaha sharciyeed ee jira.
Golahan ayaa markii ugu horreysay la dhaariyay sanadkii 2022, wax yar kadibna wuxuu doortay Madaxweynaha Xasan Sheekh Maxamuud. Madaxweynaha ayaa markaas magacaabay Ra’iisul Wasaaraha, waxaana la dhisay xukuumad dhameystiran isla sanadkaas.
Cabduladiif Muuse Sanyare oo ka tirsan baarlamaanka ayaa sheegay in goluhu hadda galayo xaalad sii hayn, taas oo u oggolaaneysa inuu qabto hawlaha aasaasiga ah, balse aanu ansixin karin sharciyo cusub ama heshiisyo waaweyn.
Xildhibaan Sanyare ayaa sidoo kale xusay in baarlamaanka uusan awood u lahayn inuu la xisaabtamo xukuumadda ama uu xilka ka qaado wasiirrada inta lagu jiro xaaladdan. Tani waxay ka dhigan tahay in awoodda sharci dejinta ay si ku meel gaar ah u xaddidan tahay.
Arrintan ayaa kusoo aadeysa xilli ay jiraan dhaqdhaqaaqyo siyaasadeed oo cusub, oo ay ka mid yihiin wararka sheegaya in guddoomiyaha baarlamaanka uu damacsan yahay inuu u tartamo xil kale. Tani waxay abuuri kartaa isbeddel siyaasadeed oo hor leh.
