Wararka24: Hoggaamiyeyaasha mucaaradka Soomaaliya ayaa maanta kulan xasaasi ah magaalada Muqdisho kula yeeshay odayaasha dhaqanka Soomaaliyeed, iyadoo diiradda lagu saarayo xaaladda siyaasadeed ee dalka iyo dadaallada lagu yareynayo xiisadaha taagan.
Kulanka oo ka dacay hoteelka Jasiira ayaa la sheegay in looga hadlayo muranka siyaasadeed ee u dhexeeya Dowladda Federaalka Soomaaliya iyo mucaaradka, gaar ahaan arrimaha la xiriira hannaanka doorashooyinka iyo sidii loo heli lahaa is-afgarad siyaasadeed.
Odayaasha dhaqanka ayaa horey kulamo gaar gaar ah ula yeeshay labada dhinac, iyagoo wada dadaallo lagu doonayo in lagu abuuro jawi wada-hadal iyo isu soo dhowaansho siyaasadeed.
Magaalada Muqdisho ayaa maalmahan martigelisay dibadbaxyo iyo dhaq-dhaqaaqyo siyaasadeed oo kala duwan, kuwaas oo ka tarjumaya kala aragti duwanaanta dhinacyada siyaasadda ee ku saabsan mustaqbalka doorashooyinka dalka.
Dhanka kale, saraakiisha amniga ayaa ku baaqay in la ilaaliyo nabadda iyo kala dambeynta, iyagoo sheegay in la qaadi doono tallaabooyin looga hortagayo fal kasta oo halis gelin kara amniga guud ee caasimadda.
Ilaa iyo hadda ma jirto war rasmi ah oo kasoo baxay kulanka socda, hase yeeshee waxaa si weyn isha loogu hayaa natiijada wada-hadallada iyo saameynta ay ku yeelan karaan xaaladda siyaasadeed ee dalka.
Kulankan ayaa kusoo aadaya xilli ay sii xoogeysanayaan dadaallada lagu raadinayo xal siyaasadeed oo lagu dhameyn karo khilaafaadka ka taagan hannaanka doorashooyinka Soomaaliya.
DAAWO
