Wararka24: Dowladda Federaalka Soomaaliya ayaa faahfaahin ka bixisay howlgal ay ciidamada kumaandooska Danab ka fuliyeen deegaanno hoostaga degmada Afgooye ee gobolka Shabeellaha Hoose, kaas oo lagu beegsaday xubno la sheegay inay ka tirsanaayeen Al-Shabaab.
War kasoo baxay dowladda ayaa lagu sheegay in howlgalka uu qeyb ka yahay dadaallada lagu xoojinayo amniga gobolka iyo howlgallada ka dhanka ah kooxaha hubeysan ee ka howlgala qeybo kamid ah Shabeellaha Hoose.
Dowladda ayaa sheegtay in howlgalka lagu qabtay hub iyo agabyo kala duwan, kuwaas oo isugu jira qoryaha AK-47, bastoolado, bambooyin iyo qalab loo adeegsado sameynta walxaha qarxa.
Hubka iyo agabka la qabtay ayaa waxaa warbaahinta usoo bandhigay ciidamada kumaandooska Danab, gaar ahaan cutubyada adeegsada gawaarida gaashaaman ee ka qeyb qaata howlgallada amniga.
Gobolka Shabeellaha Hoose ayaa muddooyinkii dambe martigelinayay howlgallo ay si wadajir ah u fulinayeen ciidamada xoogga dalka, gaar ahaan Danab iyo Gorgor, kuwaas oo lagu beegsanayo fariisimo iyo dhaqdhaqaaqyo ay dowladda sheegtay inay kooxda Al-Shabaab ku leedahay gobolka.
Saraakiisha amniga ayaa sheegay in howlgalladan ay saameyn ku yeesheen awoodda kooxda, isla markaana ay qayb ka yihiin qorshaha lagu xasilinayo deegaannada ay colaadaha ka jiraan.
Dowladda Federaalka Soomaaliya ayaa mar kale ku celisay inay sii wadi doonto howlgallada amniga ee ka socda gobollada dalka, iyadoo sheegtay in ciidamada qalabka sida ay weli wadaan dadaallo lagu xaqiijinayo amniga iyo xasilloonida deegaannada ay howlgalladu ka socdaan.
