Wararka24: Wasaaradda Caafimaadka Soomaaliya ayaa sheegtay inay xoojisay dadaallada looga hortagayo cudurka Ebola kadib markii kiisaska cudurkaasi laga soo sheegay dalal ku yaalla Bariga iyo Bartamaha Afrika.
Wasiiru Dowlaha Wasaaradda Caafimaadka, Dr. Maryan Maxamed Xuseen, ayaa sheegtay in dowladda ay diiradda saareyso diyaar garow caafimaad iyo wacyigelin bulshada ah si looga hortago in cudurka Ebola uu soo gaaro gudaha Soomaaliya.
“Maanta waxaan ka shaqeyneynaa horumarka dalkeenna, iyadoo waddamada deriska ah uu ka dillaacay cudurka Ebola oo khatar ku ah nolosha bulshada,” ayay tiri wasiiraddu.
Hadalkeeda ayay ka jeedisay kulan ay yeesheen Wasaaradda Caafimaadka, Xarunta Qaranka ee Caafimaadka Dadweynaha iyo hay’adaha caalamiga ah ee taageera arrimaha caafimaadka, kaas oo looga hadlay qorshaha ka hortagga cudurrada faafa iyo xoojinta nidaamka digniinta degdegga ah.
Dr. Maryan ayaa sheegtay in cudurka Ebola laga soo sheegay dalal ay ka mid yihiin Burundi, Jamhuuriyadda Dimuqraadiga Congo iyo Rwanda, kuwaas oo xiriir dhinaca socdaalka iyo ganacsiga la leh Soomaaliya iyo guud ahaan gobolka Bariga Afrika.
Waxay tilmaamtay in xuduudaha gobolka ay yihiin kuwo aad u furan, isla markaana dadka si joogto ah ugu kala safraan dalalka deriska ah iyagoo adeegsanaya diyaarado iyo gaadiid kala duwan, taas oo kordhin karta khatarta cudurka.
“Hal kiis oo Ebola ah ama xitaa qof looga shakiyo cudurka wuxuu sababi karaa xaalad caafimaad oo degdeg ah, maadaama Ebola uu si fudud ugu faafo bulshada dhexdeeda,” ayay mar kale sheegtay wasiiraddu.
Masuuliyiinta caafimaadka Soomaaliya ayaa sidoo kale sheegay inay sare u qaadayaan nidaamka digniinta hore ee lagu ogaanayo cudurrada faafa, iyadoo shaqaalaha caafimaadka gobollada lagu amray inay si degdeg ah usoo gudbiyaan warbixin kasta oo la xiriirta xaalado looga shakiyo Ebola.
Wasaaradda Caafimaadka ayaa ugu dambeyn ugu baaqday shacabka Soomaaliyeed inay la shaqeeyaan hay’adaha caafimaadka, isla markaana ay feejignaadaan haddii ay arkaan calaamado looga shakiyo cudurka, si looga hortago faafitaan suurtagal ah.
DAAWO
