Wararka24: In ka badan 1.7 milyan oo dollar ayaa muddo kooban loogu ururiyay qoyska Amin Abdullah oo ahaa waardiyaha lagu dilay weerar ka dhacay masaajid ku yaalla magaalada San Diego ee gobolka California, kadib markii uu isku dayay inuu badbaadiyo carruur iyo dad kale oo ku sugnaa goobta.
Amin Abdullah oo ahaa aabbe dhalay siddeed carruur ah ayaa kamid ahaa saddex qof oo lagu dilay weerarka ka dhacay xarunta Islamic Center of San Diego, oo kamid ah masaajidda ugu waaweyn gobolkaasi. Weerarka ayaa dhacay xilli carruur badan ay ku sugnaayeen iskuul ku dhex yaalla xarunta masaajidka.
Wararka ayaa sheegaya in Abdullah uu kaalin weyn ka qaatay xiritaanka gudaha xarunta iyo badbaadinta carruurta iyo shaqaalaha, kahor inta aan la dilin. Taliyaha booliska magaalada San Diego Scott Wahl ayaa ku tilmaamay ficilladiisa kuwo geesinimo leh oo badbaadiyay nafo badan.
Booliska ayaa sheegay in laba dhalinyaro ah oo hubeysnaa ay weerarka geysteen, kahor inta aan meydadkooda laga helin gaari u dhow goobta. Hay’adaha ammaanka Mareykanka ayaa baaraya suuragalnimada in weerarka uu salka ku hayo naceyb ka dhan ah Muslimiinta, kadib markii la helay qoraallo la xiriira arrintaasi.
Hoggaamiyeyaasha bulshada Muslimiinta iyo maamulka xarunta Islaamiga ah ayaa sheegay in Amin Abdullah uu naftiisa u huray difaaca carruurta, macallimiinta iyo dadka cibaadada ku jiray xilliga weerarka dhacay.
Baraha bulshada ayaa si weyn loogu ammaanay geesinimada Abdullah, iyadoo dad badan ay ku tilmaameen halyeey Muslim ah oo naftiisa u huray badbaadinta dadka kale. Lacag ururinta online-ka ah ee loo sameeyay qoyskiisa ayaa si degdeg ah uga gudubtay 1.7 milyan oo dollar.
Mas’uuliyiinta gobolka California iyo magaalada San Diego ayaa cambaareeyay weerarka, iyaga oo sheegay in goobaha cibaadada aysan noqon karin bartilmaameed lagu waxyeelleeyo dad rayid ah. Weerarkan ayaa mar kale sare u qaaday walaaca laga qabo falalka naceybka ku saleysan ee ka dhanka ah Muslimiinta gudaha Mareykanka.
