Wararka24: Somaliland ayaa ku dhowaaqday inay safaarad ka furaneyso magaalada Qudus, tallaabadaas oo ka dhigan inay magaaladaasi u aqoonsatay caasimadda dowladda Israa’iil, arrintan aya dhalisay falcelin siyaasadeed iyo mid diblomaasiyadeed.
Safiirka cusub ee Somaliland u qaabilsan Israa’iil, Maxamed Xaaji, ayaa sheegay in safaaradda Somaliland laga furi doono magaalada Qudus, islamarkaana ay dhawaan billaabi doonto howlaha diblomaasiyadeed. Wuxuu sidoo kale sheegay in Israa’iil ay safaarad ka furan doonto magaalada Hargeysa.
Mas’uuliyiinta Somaliland ayaa tallaabadan ku tilmaamay mid lagu xoojinayo xiriirka istiraatiijiga ah ee u dhexeeya labada dhinac, iyaga oo rajeynaya in iskaashiga cusub uu horseedo maalgashi, taageero siyaasadeed iyo iskaashi dhinacyada amniga iyo teknoolojiyadda.
Go’aankan ayaa yimid kadib markii Israa’iil ay si rasmi ah ugu dhawaaqday inay aqoonsatay Somaliland, taas oo ka dhigtay dalkii ugu horreeyay ee sidaas sameeya tan iyo markii Somaliland ku dhawaaqday inay ka go’day Soomaaliya sanadkii 1991-kii.
Dowladda Federaalka Soomaaliya ayaa si adag uga hortimid aqoonsiga Israa’iil ee Somaliland, waxayna ku tilmaantay xadgudub ka dhan ah midnimada iyo madax-bannaanida dhuleed ee Soomaaliya. Dowladda ayaa sidoo kale ka digtay tallaabo kasta oo dhaawici karta wadajirka dalka.
Wasiirka Arrimaha Dibadda Israa’iil Gideon Sa’ar ayaa dhankiisa soo dhoweeyay qorshaha Somaliland ee safaaradda Qudus, isaga oo sheegay inay sii xoojin doonto xiriirka labada dhinac. Madaxweynaha Israa’iil Isaac Herzog ayaa isna qaabilay safiirka Somaliland oo u gudbiyay waraaqihiisa aqoonsiga diblomaasiyadeed.
Qudus ayaa weli kamid ah magaalooyinka ugu muranka badan Bariga Dhexe, iyadoo Falastiiniyiintu doonayaan in Bariga Qudus noqoto caasimadda dowlad Falastiin oo mustaqbalka la dhiso, halka Israa’iil ay magaalada oo dhan u aqoonsan tahay caasimaddeeda.
Tallaabada Somaliland ayaa la filayaa inay dhaliso falcelin xooggan oo uga timaada dalalka Carabta iyo taageerayaasha qadiyadda Falastiin, maadaama dalal badan oo caalamka ah ay weli safaaradahooda ku leeyihiin magaalada Tel Aviv, si looga fogaado muranka la xiriira maqaamka Qudus.
