Wararka24: Siyaasiyiinta mucaaradka Soomaaliya ayaa ku dhawaaqay in dib loo dhigay bannaanbixii la qorsheeyay inuu ka dhaco magaalada Muqdisho, kadib wada hadallo siyaasadeed oo ka socda gudaha xerada Xalane.
Madasha Samatabixinta Soomaaliyeed ayaa sheegtay in go’aankan loo qaatay si fursad loo siiyo wada-hadallada u dhexeeya Dowladda Federaalka Soomaaliya iyo Golaha Mustaqbalka Soomaaliyeed, kuwaas oo ay dhex-dhexaadinayaan xubno ka tirsan beesha caalamka.
Sida lagu sheegay qoraal kasoo baxay mucaaradka, wada-hadalladan ayaa looga gol leeyahay sidii xal looga gaari lahaa arrimaha la xiriira doorashooyinka, maamulka marxaladda kala guurka, barakicinta iyo waxa ay ku tilmaameen xarig sharci darro ah.
“Madasha Samatabixinta Soomaaliyeed waxay mar kale caddeynaysaa in bannaanbaxa la qorsheeyey uu ahaa mid nabadeed oo lagu dalbanayo ilaalinta dastuurka, amniga, xuquuqda muwaadiniinta iyo jooginta doorashooyinka hal dhinac ah,” ayaa lagu yiri bayaanka.
Hoggaamiyeyaasha mucaaradka ayaa sheegay in taariikh cusub oo la qabanayo bannaanbaxa dib laga shaacin doono, iyadoo lagu saleyn doono natiijada kasoo baxda wada-hadallada socda.
Wararka ayaa sheegaya in wakiillada beesha caalamka, gaar ahaan dowladaha Mareykanka iyo Ingiriiska ay cadaadis saarayaan dowladda federaalka iyo mucaaradka si ay heshiis uga gaaraan khilaafka doorashooyinka iyo xaaladda siyaasadeed ee dalka.
Wada-hadalladan ka socda Xalane ayaa noqonaya kuwii ugu horreeyay ee noocooda ah ee lagu qabto halkaasi, iyadoo indhaha siyaasadda Soomaaliya ay ku wajahan yihiin natiijada kasoo baxda kulamadan.
