Wararka24: Wasaaradda Arrimaha Dibadda ee dowladda Imaaraadka Carabta ayaa si rasmi ah u beenisay warar sheegaya in Ra’iisul Wasaaraha Israa’iil, Benjamin Netanyahu, uu booqasho ku tagay dalkaasi ama in Imaaraadku uu martigeliyay wafdi milatari oo Israa’iili ah.
Bayaan kasoo baxay wasaaradda ayaa lagu sheegay in wararkaasi ay yihiin kuwo “aan sal iyo raad toona lahayn”, iyadoo dowladda Imaaraadka ay caddeysay in xiriirka kala dhexeeya Israa’iil uu yahay mid si rasmi ah loo shaaciyay.
Wasaaraddu waxay sheegtay in xiriirka labada dhinac uu ku dhisan yahay heshiisyada Abraham Accords, islamarkaana aanu ku salaysnayn heshiisyo qarsoodi ah ama booqashooyin sir ah.
“Sheegasho kasta oo ku saabsan booqashooyin aan la shaacin ama heshiisyo qarsoodi ah waa kuwo aan sal lahayn, ilaa ay kasoo baxaan hay’adaha rasmiga ah ee Imaaraadka,” ayaa lagu yiri bayaanka wasaaradda.
Dhanka kale, Wasiirka Arrimaha Dibadda Iran, Abbas Araqchi, ayaa ka falceliyay wararka la xiriira safarka Netanyahu, isagoo sheegay in hay’adaha ammaanka Iran ay horay ugu gudbiyeen xogtan hoggaanka dalkaasi.
Araqchi ayaa sidoo kale hadallo adag u diray Imaaraadka iyo qaar kamid ah dalalka Khaliijka, isagoo sheegay in la shaqeynta Israa’iil ay tahay arrin aan Tehran aqbali karin.
Wararkan ayaa kusoo aadaya xilli warbaahinta reer galbeedka ay si weyn uga hadlayaan warar ku saabsan weerarro militari oo qarsoodi ah oo la sheegay inay Imaaraadka iyo Sacuudi Carabiya ku qaadeen gudaha Iran intii ay socotay xiisadda gobolka.
