Wararka24: Guddiga Madaxa bannaan ee Doorashooyinka Qaranka iyo Soohdimaha Soomaaliya ayaa war cusub kasoo saaray howlaha la xiriira tirinta codadka doorashooyinka qof iyo cod ee ka dhacay maamulka Koonfur Galbeed.
Doorashooyinkan ayaa lagu dooranayay xubnaha goleyaasha deegaanka iyo baarlamaanka maamulkaasi, waxaana ay ka qabsoomeen 13 degmo oo ka tirsan Koonfur Galbeed. Guddiga ayaa sheegay in geeddi-socodka doorashadu u dhacay si nabad ah oo waafaqsan habraacyada sharciga.
Guddoomiyaha guddiga Cabdikariin Axmed Xasan ayaa sheegay in howlaha tirinta codadka iyo hubinta natiijooyinka ay si habsami leh u socdaan. Wuxuu tilmaamay in dhammaan xarumaha codbixinta lagu soo gaba-gabeeyay tirinta codadka, iyadoo loo marayo hannaan sharciyeysan oo hufan.
Cabdikariin Axmed Xasan ayaa sidoo kale sheegay in la dhameystiray habraacyadii xiritaanka goobaha codbixinta iyo gudbinta natiijooyinka hordhaca ah. Waxa uu xusay in dhammaan xogaha laga helay xarumaha codbixinta loo gudbiyay xarunta dhexe ee guddiga.
Guddiga ayaa hadda wada hubinta saxnaanta iyo sharciyadda natiijooyinka kahor inta aan si rasmi ah loogu dhawaaqin natiijada kama dambaysta ah ee doorashooyinka. Mas’uuliyiinta guddiga ayaa sheegay in taxaddar dheeraad ah la gelinayo xaqiijinta xogaha doorashada.
Doorashooyinkan ayaa qeyb ka ah dadaallada Dowladda Federaalka Soomaaliya ay ku dooneyso hirgelinta nidaamka doorashooyinka qof iyo cod. Koonfur Galbeed ayaa noqotay maamulkii ugu horreeyay ee si ballaaran u qabta doorashooyin noocaan ah tan iyo burburkii dowladdii dhexe ee Soomaaliya.
Doorashada ayaa kusoo aadeysa xilli ay jiraan muranno siyaasadeed oo la xiriira hannaanka doorashooyinka iyo dastuurka cusub. Mucaaradka ayaa si adag uga soo horjeeda hirgelinta nidaamka hadda ay waddo dowladda federaalka.
Shacabka reer Koonfur Galbeed ayaa markii ugu horreysay muddo ka badan 57 sano si toos ah uga qeyb galay doorasho qof iyo cod ah, si ay u doortaan hoggaankooda siyaasadeed.
