Wararka24: Dowladda Mareykanka ayaa la sheegay inay billowday dadaallo dhex-dhexaadin ah oo u dhexeeya Dowladda Federaalka Soomaaliya iyo Golaha Mustaqbalka Soomaaliyeed, si xal looga gaaro khilaafka siyaasadeed ee sii xoogeysanaya. Wadahadalladan ayaa kusoo aadaya xilli dalka uu wajahayo xiisado la xiriira arrimaha doorashooyinka iyo dastuurka.
Wararka la helayo ayaa sheegaya in kulan saddex geesood ah lagu qaban doono xerada Halane Camp, halkaas oo ay ku kulmi doonaan dowladda federaalka, Golaha Mustaqbalka iyo wakiillo ka socda Mareykanka. Kulanka ayaa la qorsheeyay inuu dhaco 13-ka bishan, iyadoo diiradda lagu saarayo muranka ka taagan hannaanka doorashooyinka iyo wax ka beddelka dastuurka.
Ilo xog ogaal ah ayaa sheegay in dhinaca dowladda ay kulanka ku matali doonaan Madaxweyne Xasan Sheekh iyo Ra’iisul wasaare Xamza. Dhanka Golaha Mustaqbalka ayaa waxaa lagu wadaa inay kasoo qeybgalaan Sheekh
Shariif Sheikh Ahmed iyo Madaxweynaha Puntland Saciid Cabdullahi Deni.
Kulankan ayaa noqonaya kii ugu horreeyay ee noociisa ah oo si rasmi ah loogu qabto gudaha xerada Xalane iyadoo Mareykanku uu door muuqda ku leeyahay dhexdhexaadinta. Dowladda Mareykanka ayaa la rumeysan yahay inay dadaal ugu jirto sidii loo dejin lahaa xiisadda siyaasadeed ee dalka.
Wadahadalladan ayaa imanaya kadib markii uu baaqday kulan uu horay ugu dhawaaqay Madaxweyne Xasan Sheekh oo qorshuhu ahaa inuu ka dhaco Villa Somalia. Mucaaradka ayaa ka baaqday kulankaasi, taas oo sii kordhisay khilaafka siyaasadeed ee taagan.
Soomaaliya ayaa haatan wajahaysa marxalad siyaasadeed oo xasaasi ah, iyadoo dhinacyada siyaasadda ay isku hayaan hannaanka doorashooyinka iyo arrimo kale oo la xiriira dastuurka. Waxaa si weyn loo sugayaa natiijada kasoo baxda wada hadallada la filayo inay ka furmaan Muqdisho.
