Wararka24: Xaaladda magaalada Muqdisho ayaa manta degan, inkastoo ay jireen walaacyo la xiriiray bannaanbax ay mucaaradku horay ugu baaqeen inuu ka qabsoomo caasimadda. Bannaanbaxaasi oo la qorsheeyay saacadaha hore ee subaxnimada, iyadoo isu socodka dadka iyo gaadiidku u muuqdo mid caadi ah.
Dadweynaha ay mucaaradku aya maalmihii la soo dhaafay ku baaqeen inay kasoo qeyb galaan isu soo baxa, manta waxay u muuqatay in aanay si weyn uga jawaabin baaqaasi. Tani ayaa loo arkaa caqabad siyaasadeed oo wajahday qorshaha bannaanbaxa, maadaama ka qeybgalka shacabka uu ahaa tiirka ugu weyn ee la sugayay.
Jidadka waaweyn ee magaalada waxaa si weyn loogu arkay ciidamo dowladda ah oo sugaya amniga, kuwaas oo lagu daadiyay isgoysyada muhiimka ah iyo goobaha muhiimka ah ee caasimadda. Tallaabadan ayaa qeyb ka ah dadaallada lagu xakameynayo amniga iyo ka hortagga rabshado suurtagal ah.
Wararka la helayo ayaa sheegaya in ciidamada ay gaareen guryo ay ku sugnaayeen siyaasiyiin mucaarad ah, oo ay ku jiraan Cabdiraxmaan Cabdishakuur Warsame, Cabdi Xasan Cawaale Qeybdiid, iyo Cabdiraxmaan Odowaa. Sidoo kale waxaa la sheegay in guriga Sharif Sheekh Axmed la adkeeyay amnigiisa.
Dhanka kale, Xasan Cali Kheyre ayaa la sheegay inuu isku dayay inuu ka baxo gurigiisa, balse ciidamada ayaa dib u celiyay, kadib wada hadal kooban. Xaaladdan ayaa muujineysa sida ammaanka magaalada loo adkeeyay saacadihii la soo dhaafay.
Dowladda Soomaaliya ayaa hore u sheegtay inay oggolaatay dibadbaxa, balse ku xirtay in lagu qabto garoonka Eng. Yariisow Stadium, halka mucaaradku ay doonayeen inuu ka dhaco qeybo kala duwan oo magaalada ah. Ilaa hadda, magaalada waxay u muuqataa mid degan, iyadoo shacabka intooda badan ay wataan nolol maalmeedkooda caadiga ah.
DAAWO
