Wararka24: Baarlamaanka dalka Turkiga ayaa si rasmi ah u ansixiyay heshiis deeq taageero ah oo la siinayo dowladda Soomaaliya, Heshiiskan ayaa waxaa Soomaaliya lagu siinayaa deeq maaliyadeed oo gaaraysa 30 milyan oo doolar, iyadoo tallaabadan ay muujineyso sii xoogeysiga xiriirka labada dal.
Heshiiskan ayaa yimid kadib wareegto uu saxiixay Madaxweynaha Turkiga Recep Tayyip Erdogan, taas oo lagu meelmariyay ansixinta deeqdan maaliyadeed ee loogu talagalay taageerada miisaaniyadda iyo xoojinta awoodda hay’adaha dowladda Soomaaliya.
Sida ku cad heshiiska, dhaqaalahan ayaa Soomaaliya loo siin doonaa qaab bille ah, iyadoo lacagta ugu badan ee bishii la bixinayo aysan ka badnaan doonin 2.5 milyan oo doolar, si loo taageero adeegyada dowladda iyo howlaha horumarinta.
Baarlamaanka Turkiga ayaa sidoo kale ansixiyay qorshe kale oo lagu dhisayo safaarad cusub oo Soomaaliya ku yeelan doonto magaalada Ankara, taas oo qarashkeedu lagu qiyaasay 6 milyan oo doolar.
Mudanayaasha baarlamaanka Turkiga ayaa dood dheer ka yeeshay xiriirka sii kobcaya ee Ankara iyo Muqdisho, iyagoo xusay in iskaashiga labada dhinac uu ku fidsan yahay dhinacyada amniga, dhaqaalaha, maalgashiga iyo horumarinta.
Qaar ka mid ah xildhibaanada Turkiga ayaa tilmaamay in Soomaaliya ay noqotay saaxiib istaraatiiji ah oo muhiim u ah siyaasadda Ankara ee Geeska Afrika, gaar ahaan dhinacyada ganacsiga iyo xasiloonida gobolka.
Ansixinta heshiiskan ayaa kusoo aadeysa xilli xiriirka Soomaaliya iyo Turkiga uu galay marxalad cusub, iyadoo Ankara ay sii xoojineyso doorkeeda taageero ee dhinacyada amniga, kaabeyaasha dhaqaalaha iyo maalgashiga gudaha Soomaaliya.
DAAWO
