Wararka24: Senator sare oo ka tirsan Aqalka Senate-ka ee Mareykanka ayaa maamulka Donald Trump uga digtay in uusan hakad gelin gargaarka cuntada iyo taageerada bani’aadannimo ee la siiyo Itoobiya, xilli malaayiin qof ay wajahayaan xaalad nololeed oo adag.
Jeanne Shaheen ayaa warqad rasmi ah u dirtay Marco Rubio, iyadoo ka digtay in barnaamijyo gargaar oo muhiim ah ay halis ugu jiraan inay istaagaan bisha June, haddii aan la helin maalgelin degdeg ah.
Shaheen ayaa sheegtay in hakadka ku yimaada gargaarka uu sababi karo xaalad bani’aadannimo oo culus, taas oo saameyn karta in ka badan 3 milyan oo qof oo ku nool Itoobiya, gaar ahaan dadka ku barakacay gudaha dalka iyo kuwa wajahaya cunno-yari daran.
Waxay si gaar ah u dalbatay in la taageero barnaamijka gurmadka degdegga ah ee JEOP, kaas oo gargaar cunto siiya dadka ku sugan gobolka Tigray iyo deegaanno kale oo ay saameeyeen colaadaha iyo abaarta.
Wasaaradda Arrimaha Dibadda Mareykanka ayaa dhankeeda sheegtay in aysan qorsheynin inay gebi ahaanba joojiso gargaarka cuntada ee Itoobiya, iyadoo caddeysay in Washington ay weli tahay deeq-bixiyaha ugu weyn ee taageerada siiya Addis Ababa.
Digniintan ayaa kusoo aadeysa iyadoo Itoobiya ay wali la tacaaleyso saameynta dagaalkii Tigray ee billowday 2020, kaas oo sababay dhimasho badan, burbur iyo barakac ballaaran, iyadoo malaayiin qof ay weli ku tiirsan yihiin gargaar dibadeed.
