Wararka24: Xildhibaanad Fardowsa Cismaan Cigaal oo horey u soo noqotay Wasiirka Gaadiidka iyo Duulista Hawada ee Soomaaliya ayaa maanta ku dhawaaqday inay iska casishay xubinnimadii Xisbiga Cadaaladda iyo Wadajirka (JSP), oo uu hoggaamiyo Madaxweynaha Soomaaliya Xasan Sheekh Moxamud.
Fardowsa ayaa sidoo kale ka degtay xilkii Xoghayaha Batroolka iyo Macdanta ee xisbiga, iyadoo warsaxaafadeed kooban ku xaqiijisay go’aankeeda. Waxay sheegtay inay si rasmi ah uga baxday xisbiga, balse ma aysan shaacin sababaha rasmiga ah ee ku kallifay tallaabadan.
Is-casilaadda xildhibaanadda ayaa kusoo aadeysa xilli xisbiga Cadaaladda iyo Wadajirka uu wado abaabul siyaasadeed iyo dhaqdhaqaaqyo la xiriira arrimaha doorashooyinka iyo xaaladda siyaasadeed ee dalka.
Fardowsa ayaa noqotay mas’uulkii ugu dambeeyay ee ka baxa xisbiga, kadib markii siyaasiyiin kale ay horay uga tageen. Waxaa kamid ah Abdirahman Odowaa, oo dhawaan ku biiray safka mucaaradka dowladda federaalka.
Go’aankan ayaa si weyn hadal-heyn uga dhex abuuray bulshada iyo siyaasiyiinta, gaar ahaan maadaama deegaan doorashadeedu yahay Puntland, oo kamid ah maamullada siyaasadda adag ka leh xaaladda doorashooyinka dalka.
Falanqeeyayaal siyaasadeed ayaa aaminsan in is-casilaaddan ay muujin karto kala aragti duwanaansho sii kordhaya oo ka dhex jira xisbiga talada haya, xilli dalka uu wajahayo marxalad siyaasadeed oo xasaasi ah.
