Wararka24: Dowladda Itoobiya ayaa amar cusub siisay ciidamadeeda ku sugan Soomaaliya, iyadoo ku adkeysay in aysan ku milmin arrimaha siyaasadda gudaha dalka. Go’aankan ayaa kusoo beegmaya xilli Soomaaliya ay wajahaysa xiisad siyaasadeed oo la xiriirta doorashooyinka iyo muranka dastuurka.
Taliyaha Ciidamada Dhulka ee Itoobiya ayaa farriintan u gudbiyay cutubyo cusub oo ka tirsan ciidamada difaaca Itoobiya ee loo dirayo Soomaaliya, kuwaas oo qeyb ka noqonaya howlgalka cusub ee Midowga Afrika ee AUSSOM
Saraakiisha Itoobiya ayaa ciidamada ku booriyay inay diiradda saaraan waajibaadkooda amni iyo howlaha nabad ilaalinta, iyagoo ka fogaanaya wax kasta oo la xiriira khilaafaadka siyaasadeed ee gudaha Soomaaliya. Taliska ayaa sheegay in ciidamada ay matalayaan sumcadda dalkooda, sidaas darteed looga baahan yahay xirfad iyo dhexdhexaadnimo.
Ciidamadan cusub ayaa lagu wadaa inay beddelaan cutubyo hore uga tirsanaa howlgalka AUSSOM, kuwaas oo muddo dheer ka howlgalayay gudaha Soomaaliya. Itoobiya ayaa weli kamid ah dalalka ugu waaweyn ee ciidamada ku leh howlgalka Midowga Afrika.
Dalalka kale ee qeybta ka ah howlgalka AUSSOM waxaa kamid ah Kenya, Djibouti, Uganda, Burundi iyo Masar, iyadoo howlgalka uu diiradda saarayo taageerada amniga Soomaaliya.
Falanqeeyayaasha arrimaha gobolka ayaa sheegaya in hadalkan uu muujinayo isbeddel ku yimid siyaasadda Itoobiya ee Soomaaliya, iyadoo Addis Ababa ay hadda xoogga saareyso xiriirka tooska ah ee kala dhexeeya dowladda federaalka.
Xiisadda siyaasadeed ee Soomaaliya ayaa sii xoogeysanaysa iyadoo dhinacyada siyaasadda ay isku hayaan hannaanka doorashooyinka iyo maamulka dalka, halka ciidamada shisheeye ee howlgalka ku jira lagu adkeeyay inay ka dheeraadaan arrimahaas.
