Wararka24: Go’aanka ay dowladda Imaaraadka Carabta kaga baxday ururka shidalka ee OPEC ayaa sare u qaaday doodda ku saabsan mustaqbalka iskaashiga shidaalka ee dalalka Khaliijka. Tallaabadan ayaa lagu fasiray isbeddel siyaasadeed iyo mid dhaqaale oo saameyn ku yeelan kara xiriirka u dhexeeya Imaaraadka iyo Sacuudi Carabiya. Arintan aya kadigan fursad siyasadeed oo la hordhigay Madaxweynaha Mareykanka Donald Trump
Muddo dheer, Riyadh iyo Abu Dhabi waxay isku aragti ka ahaayeen siyaasadaha tamarta, balse khilaafkooda ayaa soo ifbaxay sannadihii dambe. Sacuudiga wuxuu doorbidayay in wax-soo-saarka la xaddido si qiimaha shidaalka loo ilaaliyo, halka Imaaraadku uu taageersanaa kordhinta wax-soo-saarka si suuqa loo balaariyo.
Falanqeeyayaasha dhaqaalaha ayaa sheegaya in Imaaraadku muddo dheer qorsheynayay inuu ka baxo OPEC, maadaama uu sameeyay maalgashi ballaaran oo kor u qaaday awooddiisa wax-soo-saar. Tani waxay siinaysaa fursad uu si madax-bannaan ugu go’aansado siyaasaddiisa shidaalka.
Go’aankan ayaa sidoo kale kusoo beegmay xilli gobolka Bariga Dhexe uu wajahayo xiisado amni iyo kuwo siyaasadeed oo sii kordhaya. Khubarada qaar waxay rumeysan yihiin in tallaabada Abu Dhabi ay la xiriirto xisaab siyaasadeed oo ka baxsan arrimaha tamarta, gaar ahaan xiriirka dhow ee uu la leeyahay mareykanka iyo Israel.
Sacuudi Carabiya ayaa weli ah awoodda ugu weyn ee OPEC, waxaana la filayaa in bixitaanka Imaaraadka uu saameyn ku yeesho isku dheelitirka ururka. Sidoo kale, arrintan waxay abuuri kartaa tartan cusub oo u dhexeeya labada dal ee ugu saameynta badan Khaliijka.
Khubaro badan ayaa qaba in tallaabadan ay noqon karto calaamad muujinaysa isbeddel weyn oo ku yimaada mustaqbalka OPEC iyo suuqa tamarta caalamka, iyadoo la sugayo sida dalalka kale uga falceliyaan go’aanka Imaaraadka.
