Wararka24: Safiirka dowladda Ingiriiska u fadhiya Soomaaliya, Charles King, ayaa faahfaahin ka bixiyay xaaladaha nololeed iyo shaqo ee uu kala kulmo magaalada Muqdisho, isagoo ku tilmaamay mid kamid ah goobaha diblomaasiyadeed ee ugu adag caalamka.
Charles King ayaa sheegay in maalin kasta oo shaqo ay la socoto feejignaan amni oo sare, maadaama xaaladda magaalada ay weli wajahdo khataro dhinaca amniga ah. Wuxuu xusay in mararka qaar subaxdiisa ay ku bilaabato dhawaaqa diyaaradaha dagaalka, taas oo muujinaysa xaaladda gaarka ah ee uu ku shaqeeyo.
Safiirka ayaa tilmaamay in safaaradda UK ee Muqdisho dib loo furay sanadkii 2013, xilli Ingiriisku noqday mid kamid ah dalalkii reer Galbeed ee ugu horreeyay ee dib u soo celiya joogitaankooda diblomaasiyadeed gudaha Soomaaliya.
Waxa uu sheegay in safaaraddu diiradda saarto arrimo ay kamid yihiin amniga, gargaarka bani’aadannimo iyo xoojinta iskaashiga caalamiga ah.
Wuxuu sheegay inay si dhow ula shaqeeyaan dowladda Soomaaliya, Midowga Afrika iyo qaramada midoobay si loo xakameeyo khataraha amni ee ka imanaya kooxaha hubeysan iyo budhcad-badeedda, isla markaana loo taageero shacabka Soomaaliyeed.
Charles King ayaa sidoo kale xusay in inkasta oo ay jiraan caqabado amni, haddana howlaha diblomaasiyadeed ay sii socdaan, oo ay ku jiraan kulamo iyo munaasabado lagu xoojinayo xiriirka caalamiga ah. Wuxuu carrabka ku adkeeyay in joogitaanka Ingiriiska ee Soomaaliya uu muhiim u yahay xasilloonida dalka iyo danaha wadajirka ah ee labada dhinac.
