Wararka24: Wasiirka Deegaanka iyo Isbeddelka Cimilada ee Dowladda Federaalka Soomaaliya, Bashiir Maxamed Jaamac ayaa magaalada Addis Ababa uga qeyb-galay kalfadhiga SDG6 ee madasha ARFSD12, oo ah shir heer gobol ah oo looga hadlayo horumarinta yoolalka waara ee Afrika.
Shirkan ARFSD12 ayaa sanadkan diiradda lagu saaray dardargelinta hirgelinta yoolalka horumarineed ee Qaramada Midoobay iyo Ajendaha Midowga Afrika ee 2063, iyadoo la isku waafajinayo qorshayaasha horumarineed ee qaaradda Afrika. Madashan waxaa ka qeyb-galaya wasiirro, madax dowladeed iyo hay’ado caalami ah oo ka kala socda dalalka Afrika.
Wasiir Bashiir oo khudbad ka jeediyay kulanka ayaa ka hadlay saameynta sii kordheysa ee isbeddelka cimilada ku yeelanayo helitaanka biyo nadiif ah, isaga oo xusay in abaarta, fatahaadaha iyo yaraanta roobabka ay khatar ku yihiin ilaha biyaha ee qaaradda.
Wuxuu sidoo kale tilmaamay in kororka magaalooyinka iyo baahida bulshada ay sare u qaadeen cadaadiska saaran ilaha biyaha, taas oo sii adkeynaysa helitaanka adeegyo biyo nadiif ah iyo fayadhowr.
Wasiirka ayaa carrabka ku adkeeyay in sugnaanta biyuhu ay laf-dhabar u tahay caafimaadka bulshada, waxbarashada iyo koboca dhaqaalaha, isaga oo ku baaqay in la kordhiyo maalgelinta kaabayaasha biyaha iyo mashaariicda la qabsiga isbeddelka cimilada.
Madasha ARFSD12 ayaa la filayaa inay soo saarto talooyin iyo qorsheyaal lagu xoojinayo iskaashiga Afrika, si loo xaqiijiyo yoolka SDG6 ee helitaanka biyo nadiif ah.
