Wararka24: Ra’iisul Wasaaraha Jamhuuriyadda Federaalka Soomaaliya, Mudane Xamza Cabdi Barre ayaa maanta kulan gaar ah la yeeshay Danjiraha Kenya u fadhiya Muqdisho, Cyprian Kubai Iringo, iyadoo kulankaasi diiradda lagu saaray xoojinta xiriirka labada dal.
Kulanka ayaa waxaa sidoo kale qeyb ka ahaa Safiir Ku-xigeenka Kenya Ilyas Barre Shiil iyo howlwadeenno ka tirsan xafiiska Ra’iisul Wasaaraha Soomaaliya. Labada dhinac ayaa ka wada-hadlay iskaashiga dhinacyada amniga, dhaqaalaha iyo xiriirka diblomaasiyadeed.
Ra’iisul Wasaare Xamza Cabdi Barre ayaa danjiraha Kenya la wadaagay horumarka dowladda ka gaartay howlgalada lagula dagaallamayo kooxda Al-Shabaab, isaga oo xusay guulaha ciidamada qaranka ka gaareen sugidda amniga iyo xoreynta deegaanno muhiim ah.
Wuxuu sidoo kale carrabka ku adkeeyay muhiimadda wada-shaqeynta Soomaaliya iyo Kenya, gaar ahaan dhinacyada amniga xuduudaha, la dagaallanka argagixisada iyo ilaalinta danaha wadajirka ah ee labada dal.
Dhankiisa, Danjire Cyprian Kubai Iringo ayaa uga mahadceliyay Ra’iisul Wasaaraha qaabilaadda, isaga oo sheegay in dowladda Kenya ay ka go’an tahay sii xoojinta iskaashiga kala dhexeeya Soomaaliya, si loo xasiliyo gobolka loogana hortago khataraha amni.
Kenya ayaa qeyb ka ah howlgalka AUSSOM, iyadoo ciidamadeedu ka howlgalaan gobollada Jubbooyinka iyo Gedo, halkaas oo ay ka qeyb qaataan dagaalka ka dhanka ah Al-Shabaab.
Soomaaliya iyo Kenya ayaa muddo dheer iskaashi dhow ka lahaa dhinacyada amniga iyo siyaasadda, iyadoo labada dal ay xoojinayaan xiriirkooda xilli gobolka uu wajahayo caqabado amni oo isa soo taraya.
