Wararka24: Hay’adda Dambi-baarista ee FBI-da iyo laamaha kale ee federaalka ee Mareykanka ayaa howlgal baaritaan ah ka fuliyay in ka badan 20 xarumo ganacsi oo ku yaalla magaalada Minneapolis, kuwaas oo la sheegay in intooda badan ay leeyihiin xubno ka tirsan jaaliyadda Soomaalida.
Waaxda Caddaaladda Mareykanka ayaa sheegtay in howlgalkaasi uu qayb ka yahay baaritaan ballaaran oo la xiriira eedeymo ku saabsan lunsasho iyo adeegsi khaldan oo dhaqaale federaal ah oo loogu talo-galay adeegyada bulshada. Saraakiisha ayaa caddeeyay in baaritaannadu aysan wax xiriir ah la lahayn arrimaha socdaalka ama tarxiilka.
Sida lagu sheegay xogta rasmiga ah, ciidamada federaalka ayaa fuliyay 22 waaran oo baaritaan ah oo maxkamaddu oggolaatay, kuwaas oo lala beegsaday xarumo bixiya adeegyo caafimaad iyo kuwo bulshada ah, oo ay ku jiraan xarumaha taageera carruurta qaba Autism Spectrum Disorder.
Xafiiska Xeer-ilaaliyaha guud ee gobolka Minnesota ayaa xaqiijiyay inuu qayb ka ahaa fulinta qaar ka mid ah baaritaannada, iyadoo la sheegay in eedeymuhu la xiriiraan isticmaalka lacagaha barnaamijka Medicaid.
Arrintan ayaa kusoo aadaysa xilli ay sii kordhayaan baaritaannada lagu hayo barnaamijyada daryeelka bulshada ee gobolka, kuwaas oo lagu tuhunsan yahay musuqmaasuq iyo wax is-daba marin dhaqaale.
Mas’uuliyiinta federaalka ayaa sheegay in baaritaannadu weli socdaan, isla markaana aan wali la shaacin dacwad rasmi ah ama tirada dadka la tuhunsan yahay.
