Wararka24: Wasiir ku-xigeenka Wasaaradda Warfaafinta ee Dowladda Federaalka Soomaaliya, Cabdiraxmaan Yuusuf Cumar, ayaa magaalada Baydhabo ku tilmaamay meel ay ka muuqato iftiinka dimuqraadiyadda, isaga oo sheegay in diyar garaw siyaasadeed oo xooggan uu ka socdo deegaannada Konfur Galbeed.
Cabdiraxmaan Al-Cadaala ayaa sheegay in Baydhabo ay haatan ku sugan yihiin musharrixiin, ururro siyaasadeed iyo taageerayaal kala duwan oo ka kala yimid gobollada dalka, kuwaas oo si xor ah uga qayb qaadanaya ololaha doorashada maamulka Koonfur Galbeed.
Wuxuu xusay in magaalada ay ka socdaan shirar, abaabul iyo kulamo siyaasadeed oo nabad ah, taas oo uu ku tilmaamay tusaale muujinaya horumarka dimuqraadiyadeed ee dalka. Sida uu sheegay, dhinacyada tartamaya waxay dareemayaan rajo, cadaalad iyo xorriyad siyaasadeed.
Al-Cadaala ayaa tilmaamay in xaaladda Baydhabo ay muujinayso nooca doorasho ee dowladda federaalka ay muddo dheer ballanqaadaysay, isaga oo sheegay inay meesha ka baxayso cabsi iyo kala shakigii siyaasadeed ee jiray.
Wasiir ku-xigeenka ayaa sidoo kale sheegay in tartanka siyaasadeed ee socda uu fursad siinayo siyaasiyiinta doonaya inay awooddooda iyo kartidooda ku muujiyaan doorasho xor ah, si ay uga qayb qaataan hoggaanka dalka iyo maamulka deegaannadooda.
Wuxuu intaas ku daray in dhacdooyinka ka socda Baydhabo ay fariin dhiirrigelin ah u dirayaan shacabka Soomaaliyeed, gaar ahaan kuwa doonaya inay dib u helaan xuquuqdooda siyaasadeed iyo awoodda ay ku dooranayaan hoggaankooda.
Hadalka Al-Cadaala ayaa kusoo beegmaya xilli magaalada Baydhabo ay martigelineyso qabanqaabada ugu dambeysa ee doorashada maamulka Koonfur Galbeed, iyadoo ay isa soo tarayaan dhaq-dhaqaaqyada siyaasadeed ee ka socda halkaasi.
