Wararka24: Madaxweynaha Dowlad-goboleedka Puntland Siciid Cabdullaahi Deni ayaa safar shaqo ku tegay degmada Badhan, halkaas oo uu kulan kula yeeshay Suldaan Siciid Suldaan Cabdisalaam Suldaan Maxamuud Cali Shire.
Wafdiga Madaxweynaha waxaa qeyb ka ahaa Guddoomiye Ku-xigeenka koowaad ee Golaha Wakiillada Maxamed Baari Shire, xubno ka tirsan goleyaasha dowladda iyo saraakiil ciidan oo ka tirsan maamulka Puntland.
Kulankan ayaa kusoo aadaya xilli inta badan isimada dhaqanka Puntland ay ku sugan yihiin Muqdisho, halkaas oo ay kulamo kula yeesheen Xasan Sheekh Maxamuud iyo Xamza Cabdi Barre si ay uga wada hadlaan xaaladda guud ee dalka iyo arrimaha dib-u-heshiisiinta.
Kulamadaas ayaa yimid xilli uu weli taagan yahay khilaafka siyaasadeed ee u dhexeeya Dowladda Federaalka Soomaaliya iyo Puntland, iyadoo labada dhinac ay isku hayaan arrimo siyaasadeed iyo hannaanka dowlad-dhiska.
Dhanka kale, Madaxweyne Deni ayaa degmada Badhan ka xarigga ka jaray xarunta cusub ee taliska Booliiska gobolka Sanaag, taas oo qeyb ka ah qorshaha dib-u-habeynta iyo tayeynta ciidamada Booliiska Puntland.
Munaasabadda xarig-jarka waxaa ka qeybgalay mas’uuliyiin ka tirsan Puntland, saraakiil ciidan, maamulka gobolka Sanaag iyo marti sharaf kale, iyadoo la sheegay in xaruntan cusub ay muhiim u tahay xoojinta amniga gobolka.
