Wararka24:Xildhibaan Aamino Eelaay oo ka tirsan Golaha Shacabka Soomaaliya ayaa shaacisay xog ku saabsan doorashada Maamul-goboleedka Koonfur Galbeed, xilli magaalada Baydhabo ay ka socoto qaban qaabadii ugu dambeysay ee doorashada.
Aamino Eelaay oo ku sugnayd garoonka Shaati Gaduud ayaa ka qeyb gashay soo dhaweynta wafdi uu hoggaaminayay Sheekh Aadan Maxamed Nuur Madoobe, oo kamid ah musharrixiinta ugu cad cad ee xilka hoggaanka maamulkaasi.
Waxay sheegtay in guud ahaan diyaar garowga doorashada uu ku socdo jawi deggan, iyadoo tilmaantay in musharrixiintu ay si caadi ah u wataan ololahooda siyaasadeed. Sidoo kale waxay xustay in Aadan Madoobe uu yahay siyaasi khibrad leh oo door ka qaadan kara mideynta bulshada Koonfur Galbeed.
“Maanta waa maalin weyn, guddoomiyihii baarlamaanka ayaan soo dhaweyneynaa, waana musharrax madaxweyne, waxaanan aaminsanahay inuu yahay qof isku keeni kara bulshada,” ayay tiri Aamino Eelaay.
Waxay sidoo kale ugu baaqday shacabka reer Baydhabo inay ka shaqeeyaan nabadda iyo xasilloonida, iyadoo ku adkaysay muhiimadda ay leedahay wadajirka bulshada xilligan kala guurka ah.
Doorashada Koonfur Galbeed ayaa kusoo aadeysa xilli uu xilka ka degay madaxweynihii hore Cabdicasiis Xasan Maxamed Laftagareen, kadib isbeddello siyaasadeed oo ka dhacay magaalada Baydhabo.
Ilo siyaasadeed ayaa tilmaamaya in Villa Somalia ay si dhow ula socoto geeddi-socodka doorashada, iyadoo dadaal xooggan ku bixineysa qaabeynta hoggaanka cusub ee maamulkaasi.
Si kastaba, xaaladda Baydhabo ayaa weli ah mid xasaasi ah, iyadoo la sugayo sida ay u dhacdo doorashada iyo cidda hoggaamin doonta Koonfur Galbeed mustaqbalka dhow.
